Талай кюнню мындан алгъа Россия Федерацияны Президенти В. Путин Москвада Кърал советни кёзюулю джыйылыуун бардыргъанды.
Анда Россияны субъектлеринде конкуренцияны ёсдюрюуге джакълыкъ этиуде баш магъаналы ишлени ачыкълау бла бардырыугъа болушууну мадарларына къаралгъанды. Ол джыйылыуну ишине Къарачай-Черкесияны Башчысы Темрезланы Рашид да къошулгъанды.
Президент, джыйылыуда конкуренцияны юсюнден айта, аны къралны башчысыны Федерал Джыйылыугъа этген Чакъырыуунда белгиленнген баш борчланы толтурууда уллу магъанасы болгъанын айырыб чертгенди.
«Тюз эмда джорукълу конкуренция къралны экономика эмда технология джаны бла ёсдюрюуню, хар санагъатда алгъа таукел барыуну баш тамалыды», - дегенди В. Путин ол джыйылыуда.
Россияны регионлары конкуренцияны къралны Правительствосу бегитген стандартларын джашаугъа 2015-чи джыл сингдириб башлагъандыла. Къралны Президенти, былтыр эндреуюк айда указ алыб, анда конкуренция властны органлары бардыргъан баш ишлени бирича белгиленнгенди. 2018-чи – 2020-чы джыллагъа белгиленнген Миллет планда уа конкуренция бардыргъан ишлеринде баш орунну алыргъа керекли санагъатланы тизими берилгенди. Аны бла да къалмай, ол ишни къаллай кёргюзюмлери болургъа кереклилери да берилгендиле.
«Мен акъыл этгенден, - дегенди Президент, - аллай кёргюзюмлери хар регионну да болургъа керекдиле. Айхай да, ол планла Федерацияны субъектлери бла бирге аланы экономика, бирси хыйсабларына кёре джарашдырылыргъа тыйыншлыдыла».
Алай бла Россия Федерацияны башчысы хар джерде конкуренция болумла къурауда, джангы энчи предприятиеле ачыуда этиллик ишлени ачыкълагъанды.
Властны органларыны бу затда баш борчлары, Президент айтхандан, къралны ичинде да, тышында да изленнген, импорт товарланы орунларын тутхан бусагъатхы конкурент хыйсаблы товарланы чыгъаргъан санагъатлагъа, компаниялагъа джакълыкъ этиу, болушуу болургъа керекдиле. Алай а, дегенди Президент, властны органлары бир-бир джерледе ол ишни ачабыз, деб, башха джерледе ары дери аллай асыулу продукция чыгъарыб тургъан санагъатланы ёсерлерине чырмау болургъа керек тюлдюле.
