Къралыбызны Кремль Къаласында уллу байрам концерт  болду. Ол Къарачай-Черкес эмда Ингуш республикала къуралгъанлы 25-шер джыл болгъанына аталгъан эди. Кърал тамадаланы атларындан сёлешиб, Россияны Федерал Джыйылыууну Федерация Советини Председатели Матвиенко Валентина эки республиканы халкъларын, Москвагъа концерт  программалары бла баргъан келечилени да юбилейлери бла алгъышлай, былай айтды:
- Сиз юбилей байрамларыгъызны къралны Кремль Къаласында бирге белгилегенигиз бек огъур ышанды. Бу зат шохлукъну, бир-бирин ангылауну эмда биригиб ишлей билиуню кёзге кёрюннген ашхы юлгю болгъанына шагъатды. Алайды да, бу иш бютеу къралгъа кёрюннген иги белгиди.

Республикала алкъын джашдыла, алай а аланы тарих джоллары бурун заманладан келедиле. Сизни хорламларыгъыз да, башха джетишимлеригиз да къралыбызны махтауудула. Ол зат Ата джуртха толу берилиуню, аны ючюн кесин аямауну юлгюсюдю. Сизни джеригизде миллет адетлеригиз бла дин келишмекликге уллу сый, магъана бергенигиз, ол шартланы, сакълай, тута билгенигиз да танылыб турады.
Ётген 25 джыл эки республиканы джазыуларын керти да игиге бургъан заманды. Къарачай-Черкесия бла Ингуш республикала кёрюнюрча тюрленнгендиле. Ол регионлагъа джолоучу болгъан заманымда аланы экономикаларыны, социал ишлерини ёсе, айный баргъанларына ажымсыз бола эдим. Ол джетишимле сизни республикаларыгъызны халкъларыны халал уруннганларындан болгъандыла.
Тау адетлерине таяна Къарачай-Черкесия да, Ингушетия да алгъа таукел барадыла. Алай болгъаны уа, Шимал Кавказда шохлукъну бегирине ышандырады. Республикала кеслерини культура, этнография байлыкълары, бириге билиулери бла да махтаулудула. Ол зат  а эки республикада, саулай Россияда, ёмюрде киши да бузалмазлыкъ бирикмекликни танытхан ышанды.