Юйдегини джылына аталыб, «Архыз» курортда «Свадьба на высоте» деген проектни джашауда бардырыб башлагъандыла.

Мындан алда «Архыз» курорт бла Къарачай-Черкесияны ЗАГС управлениесини Черкесск шахарда бёлюмю «Союз» деген чынды джолну баш станциясында джангы юйленнген юч юйдегини эсебге алгъанды.
«Архыз» УК-ны хайырландырыу къуллугъуну тамадасы Сергей Решетников: «Свадьба на высоте» деген проект юйдеги къурауну байрамын унутулмазча этерге мадар береди. Биз бу джаш адамла бла бирге къууанабыз. Юйдегини джылына атаб, таулада джангы къуралгъан юйдегилени эсебге алыб тебрегенбиз. Курортну къонакълары бла республикада джашагъанла бу джумушубуз бла сау джайны хайырланыргъа боллукъдула. Аны ючюн ЗАГС-ны Черкесск шахарда бёлюмюне тилек къагъыт берирге керекди. Таза джюрекден джаш юйдегилени бу джарыкъ кюнлери бла алгъышлайбыз. Кёб эмда насыблы джашагъыз!» – деди джаш адамланы алгъышлай.
Джангы къуралгъан юч юйдегини тойлары чынды джолну баш станциясында къууанч халда этилди. Аны кёзюуюнде джаш адамлагъа «Архыз» курорт бла ЗАГС-ны управлениесинден саугъала берилгендиле.
«Былайыны табигъатыны ариулугъу кёлюнгю джарыкъ этеди. Джашауумда эм магъаналы кюнюмю былайда ашыргъаныма бек къууанама. Бу къууанчыбыз таулада бардырылыб, насыблы юйдегилени бири болгъанбыз», - деди джангы юйленнгенлени бири Елизавета Бьюкова.
«Юйдеги къураугъа аталгъан къууанчны ачыкъ джерледе бардыргъаныбызны магъанасы неди десегиз, ариу табигъатыбызны кёргюзюрге излейбиз. Республикабызны ариу джерлери кёбдюле, бизге джер-джерден джангы юйдеги къурагъанла келиб, регистрация этедиле. Быйыл 2024-чю джыл баргъаны себебли, аллай къууанчланы хар айны 24-чю кюнюнде бардырыргъа дейбиз. Аны ючюн, бир айны алгъа ЗАГС-ха барыб, тилек къагъыт джазаргъа керекди», - деди Къарачай-Черкесияны ЗАГС управлениесини тамадасы Семенланы Елизавета.

(БИЗНИ КОРР.).