Мындан алда Къарачай-Черкес Республиканы Аскер комиссариатында Эресейни аскер комиссариатлары къуралгъанларына 100 джыл толгъанына аталгъан къууанч джыйылыу болду.
Ары келгенлени арасында Къарачай-Черкес Республиканы Башчысыны эмда Правительствосуну Администрациясыны тамадасыны биринчи орунбасары Семенланы Ахмат, Къыбыла аскер округну стратегиялы командованиесини бирикген къауумуну инспектору генерал-майор, педагогика илмуланы кандидаты Юрий Злыгостев, Къарачай-Черкесияны аскер комиссары полковник Сергей Белобородов, республиканы журналистлери, Эресей Федерацияны Аскер кючлерини ветеранлары, республиканы муниципал къуралышларыны аскер комиссарлары эмда башхала бар эдиле.
Сергей Белобородов джыйылгъанланы Аскер комиссариатны 100-джыллыкъ юбилейи бла джылы алгъышлады. Комиссариатны ветеранларына, бусагъатда ишлеген къуллукъчуларына, ала къыйын ишлеринде кёргюзген мийик джетишимлери ючюн, разылыгъын билдирди. Республикада аскерге чакъырыуну халы иги болгъаныны юсюнден да хапар айтды.
Андан сора къуллукъларыны джууаблылыгъын терен ангылай, аскер, аскерге чакъырыу джанындан тыйыншлы ишле бардырыб, кече-кюн демей, кюрешген аскер къуллукъчула, ала бла байламлы джумушла бардыргъан башха кёб адам Къарачай-Черкес Республиканы Башчысыны Темрезланы Рашидни, Халкъ Джыйылыууну (Парламентини), Правительствосуну Хурмет грамоталары, Бюсюреу къагъытлары бла саугъаландыла. Талай адам Къыбыла аскер округну аскерлерини командующийини эмда управлениени тамадасы - Къыбыла аскер округну штабыны тамадасыны орунбасарыны саугъаларын алдыла.
Къарачай-Черкесияны аскер комиссары Сергей Белобородов айырылыб атлары иги бла айтылгъан къуллукъчуларын, республиканы ала бла байламлылыкъда ишлеген журналистлерин, «100 лет Военным комиссариатам» деген юбилей медалла бла саугъалады. Аланы арасында «Къарачай» газетни журналисти Лепшокъланы Хусеин, «День республики» газетни журналисти Килба Светлана, «Черкес хэку» газетден Туаршева Ира, «Абазашта» газетден Клычев Руслан, «Ногъай давысы» газетден да Найманов Асан, телевидиеден да бир къауум адам бар эди.
Узеирланы Хусеин.
