Эресей Федерацияны Украинада спецоперация бардыргъан Сауутлу кючлерин джакълау бла байламлы уллу акциягъа Къарачай-Черкесияны школ сохталары да къошулгъандыла.

Сёз ючюн, Уруп районну Уруп элинде джашагъан школчу джашчыкъла бла къызчыкъла, «Хорлам ючюн» деген чакъырыуну белгилеген «Z» харифни суратыча тизилиб, къралыбызны Сауутлу кючлерине джан аурутханларын билдиргендиле.

- Бусагъатда кимге да къыйын заманды. Бизни къралгъа тёрт джанындан ёчюгюб тургъанла кёбдюле. Кюнбатыш къралла тюрлю-тюрлю тыйгъычла (санкцияла) салыб кюрешедиле. Бизни борчубуз къуугъун этиб айланнганлагъа, провокаторлагъа кесибизни алдатмай, аскерчилерибиз бла бир иннетли болгъаныбызны билдириудю. Ёсюб келген джаш тёлюню да ол затха юретирге керекбиз, - деб хапар айтханды  школну устазларыны бири.

Алгъаракъда республиканы активистлери, РФ-ны Сауутлу кючлерин джакълай, кёбчюлюк акция (флешмоб) этген эдиле. Акциягъа къошулгъанла, эресейчи аскерге джан аурутханларын билдире, машиналагъа «#Z» деген хэштегни джабышдырыб, узунлугъу 60 метр болгъан кърал байракъны джайыб баргъандыла. Ызы бла да Черкесскени орамларында автопробег къурагъандыла. Шахарчыла да ол ишни джакълагъан эдиле. «Z» харифни эресейчи солдатла техникаларына джабышдырадыла. Тюз уруннган адамла да бусагъатда Украинада къыйын борчну толтургъанла бла бир иннетлиликлерин ол халда билдиредиле.