Байрым (февраль) айны 28-де КъЧР-ни Премьер-министри Мурат Аргунов республиканы Правительствосуну кенгешин бардыргъанды. Анда 18 соруугъа къаралгъанды.
Кенгешни аллында Правительствону келечилери «О республиканском бюджете Карачаево-Черкесской Республики на 2022 год и на плановый период 2023 и 2024 годов» деген законнга талай тюрлениуле кийириу бла байламлы бегимни къабыл этгендиле.
Министрле «Об организации работы по подготовке к пропуску весеннего половодья и летне-осенних паводков в 2022 году» деген бегимни проектин къабыл этгендиле. Аны КъЧР-ни табигъат байлыкъла бла экологиясыны министри Къочхарланы Диана теджегенди.
Кенгешде «О предоставлении мер социальной поддержки по оплате жилого помещения и коммунальных услуг отдельным категориям граждан, проживающим в Карачаево-Черкесской Республике» деген законну проектине тюрлениуле кийирилгендиле.
КъЧР-ни урунуу бла социал ёсюмюню министрини борчларын толтургъан Мадина Шаева айтхандан, 2022-чи джыл башил (январь) айны 1-ден коммунал джумушла ючюн борчлары болгъанлагъа да субсидия берилликди. Аны бла бирге, юч джылны ичинде коммунал джумушлагъа борчлары болуб, аланы тёлетиу бла байламлы ишге сюдде къаралыб, сюдню бегими кючюне кирген эсе, субсидия бериллик тюлдю.
Башил (январь) айны 1-не дери субсидия коммунал джумушлагъа борчлары болмагъанлагъа бериле эди.
Кенгешни кёзюуюнде табигъат джерлени сакълауну, экология эмда гелогия контролну, кёб фатарлы юйле ишлеуню, архив ишде законну сакълауну, джаныуарланы тутууну дагъыда башха затланы юслеринден бегимлени проектлерине къаралгъанды.
