Къарачай-Черкес Республиканы Башчысы Темрезланы Рашидни Инстаграмда аккаунтуна джамагъат джазгъанлай, кеслерини джарсыуларыны юслеринден айта, регионну тамадасындан болушлукъ излегенлей турадыла. Ол да, бир тилекни да сансыз этмей, хар бир адамны соруууна джууаб бергенлей, болушханлай турады.
Адыге-Хабль элни адамлары билдиргенден, элни Комсомольская орамында эмда Пушкин атлы орамдан Подгорная орамгъа дери чыракъла джокъдула.
«Комсомольская орамда бир джангыз чыракъ джокъду. Бу орамны къайгъысын ёмюрю киши кёрмейди. Бек къыйынмыды былайда бир-эки чыракъ такъгъан? Бир джылны мындан алда Инстаграмда «ЧП КЧР» пабликге да джазгъан эдик киши сан этмейди. Джангыз сиз болушаллыкъсыз бизни джарсыуубузгъа деб, ышанабыз», - деб айтыла эди тарыгъыуда.
Темрез улу бу ишни юсюнде болумну толусу бла ачыкълагъандан сора Адыге-Хабль элни администрациясыны башчысы Руслан Герговну башчылыгъы бла Адыге-Хабль РЭС-ни къуллукъчулары элни Комсомольская орамында эмда Пушкин атлы орамдан Подгорная орамгъа дери джангы чыракъла салгъандыла, эскилени лампаларын ауушдургъандыла.
Бюгюнлюкде Адыге-Хабль элни орамларында чыракъла бла байламлы джарсыу джокъду, район электросетлени къуллукъчулары уа быллай табсыз болумда джашаргъа керек болгъанлары ючюн элчиледен кечмеклик да тилегендиле.
Черкесск шахарны Гутякулов атлы орамында орналгъан 34-чю номерли кёб фатарлы юйде джашагъан адамла Темрезланы Рашидден юйню башындан суу акъгъанына бир мадар деб тилегендиле.
Адамла айтхандан, бу юйню башындан суу акъгъанлы талай джыл болады. Экинчи подъездде джаугъан джангур электрокъууатны щитине къуюлгъаны амалтын, от тюшеди деб да, къоркъадыла ала.
«Юйюбюзню башындан суу агъады. Джангур джауса, джер-джерге сауутла салабыз. Электрокъууат чыбыкъла болгъан джерде суу амалтын от тюшгени болса, анга ким джууаблы боллукъду? Биз джаныбызгъа къоркъабыз», - деб джазгъанды бу юйде джашагъан бир тиширыу.
Къарачай-Черкес Республикада Кърал мекямгъа джууаблы управлениени инспекторлары «Первое ЖКУ» УО ООО-гъа бу юйню башын къысха заманны ичинде ремонт этерге борч салгъан эдиле.
Бюгюнлюкде бу кёб фатарлы юйде ремонт ишле бардырылгъандыла, джангур джауса, суу къуюлады деген къоркъуу джокъду.
Темрезланы Рашидге тарыгъыула, тилекле республиканы болгъан районларындан, эллеринден да келедиле. Ол аланы бирин да сансыз этмейди, кёзюую бла хар бирине къараб, тыйыншлы оноу этеди, болушлукъ табдырады.
ХУБИЙЛАНЫ Фатима.
