Бу кюнледе Къарачай-Черкес Республиканы Башчысы Темрезланы Рашид Эресей Федерацияны Президенти Владимир Путинни КъЧР-де приёмныйинде республиканы адамлары бла энчи тюбешле бардыргъанды.

Башчыгъа кеслерини джарсыуларын айтыргъа республиканы эллеринден, шахарларындан да талай адам келген эди. Ала бла сёлешгенинден сора, аланы джарсыуларыны, излемлерини тамалында тюрлю-тюрлю ведомстволагъа амалсыз толтурулургъа керекли талай джумуш бергенди, ол ишле не заманнга тындырылыргъа керекли болгъанларын да белгилегенди.
Алайды да, республиканы адамларыны тилеклерини тамалында Темрезланы Рашид Черкесск шахарда Подгорная атлы орамны 2020-чы джылны аягъына толусу бла джангыртыргъа, Московский посёлокда эмда Черкесскени Юбилейный тийресинде 2020-чы джыл хар не керекли бла толусу бла баджарылгъан спорт майданла къураргъа деген джумушланы белгилегенди.
Амалсыз тындырылыргъа керекли ишлени тизиминде дагъыда Московский посёлокну паркына чыракъла салыу, 2020-чы джылны ичинде Даусуз эмда Къызыл Уруп элледе джарыкълыкъ юйлени толусу бла джангыртыу, Урупда район больницагъа баргъан джолну игилендириу, Морх элни бёлек орамы бла орта школуна газ быргъыланы тартыу, Джёгетей Аягъы шахарда эм гитчечиклеге джараулу, 60 орну болгъан яслиле ишлеу дегенча джумушла да бардыла.
Темрезланы Рашид республиканы адамлары бла энчи тюбешиуюнден сора 2019-чу джылны аягъына дери кёзюуде Хабез элде спорт бла кюреширча эмда ГТО-ну мардаларын толтурургъа мадар болурча спорт майданны къурулушу тамамланыб, адамла аны бла хайырланыб башларча болургъа кереклилерин да чертгенди.