Бу кюнледе Къарачай-Черкес Республиканы Башчысы Темрезланы Рашид «Эресейни ёлюмсюз полку» деген Бютеуэресей бирлешликни ара штабыны келечиси Борис Левитский бла тюбешиб, джаш тёлюню арасында патриот иннетни сингдириуню джолларыны юслеринден ушакъ этгенди.

Тюбешиуню ишине КъЧР-ни Башчысыны Администрациясыны эмда Правительствосуну тамадасы Мурат Озов да къошулгъанды.

Джыйылыуда Темрезланы Рашид Къарачай-Черкес Республикада «Ёлюмсюз полкга» къошулгъанланы саны джыл сайын ёсюб баргъанын айтханды. «Бир ишексиз, бу иш республикабызны джамагъатына багъалыды. Хар бир юйдегини кесини къазауатда шейит болгъан адамы, фронтовиги, джигити барды. Бу акция Уллу Хорламны келтиргенле бла ёсюб келген тёлюню арасында ёмюрлюк байламлылыкъ болгъанын ачыкъ танытады», - деб чертгенди республиканы Башчысы.

Джыйылыугъа келгенле джаш тёлюню Ата джуртну сюерге юретген, «Ёлюмсюз полкга» ушаш акцияла къураб, аланы аслам бардырыргъа кереклисин чертгендиле.

Алай бла, Къарачай-Черкес Республиканы джаш тёлюсю Эресейни Къыбыла регионларында бардырыллыкъ бютеу патриот иннетни сингдирген ишлеге къошуллукъдула. «Хорламны келтиргенлени туудукълары», «Ёлюмсюз полкну энчи къагъытлары бла суратлары» деген маданият эмда патриот сезимлени ёсдюрген проектлеге къошуллугъуна келишиу этгендиле.

Джыйылыуну аягъында Борис Левитский Къарачай-Черкес Республиканы алчы джаш адамлары 2020-чы джыл джаз Сочи шахарда ётерик регионла арасы патриот форумну ишине къошулурларын да излегенди.