Бу кюнледе Къарачай-Черкес Республиканы Башчысы Темрезланы Рашид Москвада Эресейни Правительствосуну Председателини орунбасары  Виталий Мутко бла тюбешгенди. Ала республиканы социал-экономика ёсюмюню эмда Къарачай-Черкесияда хайыр келтирлик миллет проектлени джашаугъа сингдириуню сорууларына къарагъандыла.

Темрезланы Рашид айтхандан, Элни джылында шахарлада, элледе орун алгъан «Жильё и городская среда», «Формирование комфортной городской среды», «Обеспечение устойчивого сокращения аварийного  жилищного фонда» деген программалагъа терен эс бёлюннюкдю. Ол программаланы тамалында социал эмда коммунал инфраструктураланы объектлери ишленникдиле, паркла джарашдырылыб, айбат тюрсюн аллыкъдыла. Адамла таб солурча, солуу заманларын зауукълу ашырырча мадарла къураллыкъдыла. Аны тышында республиканы джылыу берген комплексини реконструкциясы этилликди. Адамлагъа таза суу бериу иги боллукъду.

Джёгетей Аягъы шахарда Шохлукъну паркыны реконструкциясы да бардырыллыкъды. Шахарны айбат этиуде ол уллу проектлени бириди.

Андан сора ала Къарачай-Черкесияны 100-джыллыкъ юбилейине хазырланыуну темасына да эс бёлгендиле. Вице-премьер Къурау комитетге тамадалыкъ этиб, федерал, регионал ведомстволаны, маданият, социал джаны бла биригиб бардыргъан ишлерин контролда тутады. Ала джашауда таб орун алырча мадарла къураргъа болушады.