«Джарыкъ джаныб, дженгил джукъланнган» хурметли джердешибизге – Башкаланы Таубийни джашы Къурманнга – «Эресей Федерацияны Джигити» деген ат аталырын бютеу джамагъат ашыгъыб сакълайды.

Тамам джашар-ашар кёзюуюнде керти дуниягъа кетген Къурманны джашау джолу къысха болду эсе да, аны джарыкъ тюрсюню, ашхы ишлери, къралыбызгъа керек кюнде этген джигитликлери джюрекледе ёмюрлюкге сакъланныкъ джарыкъ ыз къойгъандыла.
Башкаланы Таубийни джашы Къурман Къарданик станседе орта школну джетишимли бошагъанындан сора эки баш билим алгъанды. Юрист, инженер усталыкълары болгъан джаш, аскер къуллукъгъа кёллениб, Сторожевой станседе орналгъан 34-чю тау моторлу мараб атыучу бригаданы къурамына киргенди.
Келишиулю, терен акъыллы, таукел джаш аскерчилени араларында кесине дженгил огъуна тыйыншлы орун айыргъанды. Къуллукъ борчларын мийик дараджада толтургъан уланны аты къуру да махтау бла айтылгъанлай тургъанды. Къуллукъ этген кёзюуюнде этимлилиги, антына кертилиги ючюн кърал Къурманны атын «За участие в контртеррористической операции на Кавказе», «За мужество и отвагу «Антитеррор» дегенча саугъала бла да талай кере табханды.
2-3 джылны мындан алда атасы Таубий ауушханындан сора Къурман, анасы Фатимагъа билек болуб, кесини гитче къызчыгъы бла бирге Башкаланы юйдегиге аталыкъ этиб тургъанды.
32 джылгъа келген Къурманны саулугъу, къуллугъу, юйю-кюню, хар неси да таурухдача болуб тургъанлай, Аллах анга уллу сынау буюргъанды: биз рахат джашагъан кёзюуде анга, къолуна сауут-саба алыб, къралыбызны политикасын джакъларгъа керек болгъанды. Башка улу ол сынаудан да сыйы бла ётгенди.
ДНР бла ЛНР-ни украиначы миллетчиледен азатлаугъа аталгъан спецоперация башланнганында, Къарачайны батыр уланы анга ал сафлада къошулгъанды. Аскер нёгерлери бла бирге Къурман, джанын-къанын аямай, къралыбызны политикасын джакълагъанды.
014885-чи номерли аскер бёлекни тау моторлу мараб атыучу батальонуну тобла (мина) атыучу батареясыны аскер бёлегини тамадасы, лейтенант Башкаланы Къурман къыйын болумда къралыбызны Сауутлу кючлерин алгъа чыгъарыргъа джарарыкъ амалла этиб, тыйыншлы оноулары бла къанлы урушлада нёгерлерини да, кесини джанын да къалдырды деген хапарла фронтдан келгенлей туруучан эдиле. СВО-дан юйлерине солургъа келген джашладан хапар сорсакъ, ала да аны атын махтау бла сагъыныучан эдиле.
Алгъаракъда Башкаланы Къурман, къанлы урушланы биринде атылгъан тобну кесеклери тийиб, джаралы болуб тургъанлай, кесини таукеллиги бла аскерчилерин къуршоудан чыгъаргъаныны, ол джигитлиги ючюн, махтаулу джердешибиз Жуковну медалы бла саугъаланнганыны хапарын ёхтемлениб басмалагъан эдик.
Джарасын бакъдырыргъа госпиталгъа, андан да юйюнде саулугъун бир кесек тюзетирге, джангы туугъан джашчыгъын да кёрюрге джиберилгенинде да, тынгысыз Къурман аскер тенглерине къайгъырыб, джарасы иги болуб да бошагъынчы ызына кетген эди. Аллай къайгъырыулу башчы болгъаны ючюн аскерчиле аны сыйын кёре эдиле. Кеслери да, башында сагъынылгъан чурумла бла алгъышлай, «Лучшему командиру» деб джаздырыб, саугъагъа алтын сагъат берген эдиле да, Къурман, тенглерине разылыгъын билдире, аны не уллу саугъадан да бек багъалата эди. Эт-джен адамларына, тенглерине джукъ болмасын ансы ол отха-суугъа да кирлик эди. Кирген да этгенди…
Аууз-герги (октябрь) айны 20-да болгъан бир уллу урушну кёзюуюнде, Башка улу таб марагъаны бла джауну талай аскерчисин къурутуб, огъун-тобун атылтыб, уллу джигитлик этгенди. Украинаны миллетчилери башларындан окъла-тобла ата тургъанлай, ол медицина къуллукъчулагъа къоркъуулу джерден джаралы аскерчилени чыгъарыргъа да болушханды. Аны тирилиги бла алайда бёлек аскерчи сау къалгъанды. Тегаран, кимге да джанындан юлюш этиучю Къурманны кесине алайда атылгъан тобну кесеги тийиб, ол ёлюб къалгъанды, Аллахны рахматында, Файгъамбарны (гъ.с.) шапагъатында болсун.
Бу бушуу хапар джайылгъанында, Къурманны таныгъанла-билгенле, тюз хапарын эшитгенле, аны эт-джен адамлары эмда тенглери бла бирге бир да бек къыйналдыкъ. Аллах аны адамларына уллу тёзюм, джюрек рахатлыкъ берсин, Къурманны атын айтдырлыкълагъа да узакъ ёмюр буюрсун.
Аны аскер башчысы джигит уланны ахыр такъыйкъаларыны юсюнден: « ...лейтенант Башкаев Курман Таубиевич своими смелыми и решительными действиями, проявляя мужество и отвагу, внёс значительный вклад в защиту государственных интересов Российской Федерации и достоин награждения звездой Героя России посмертно», - деб, письмо джазгъанды.
Аскер борчун толтурур ючюн джанын берген Къурман Эресейни керти Джигити болгъанына ишек джокъду. Къралны джигитлеге джораланнган баш саугъасы - «Алтын джулдуз» аны юйюрюне къысха заманда берилир, сабийчиклери да, аталарына ёхтемлене, аныча ашхы адамла болуб ёсерле деб ышанабыз.
Анасы Фатима уа, башын бушуу басыб, кёзлери джыламукъладан кебмей тургъанлай, Къурманны ёлюгюн уруш бара тургъан джерден алыб чыкъгъан джашлагъа саулукъ-эсенлик тилейди.
«Кеслерини джанларына къоркъуу болгъанына къарамай, мени баламы алайдан чыгъаргъан джашла сау болсунла. Къысха заманда спецоперация бошалыб, ала бары да юйлерине сау-эсен, хорлам бла къайтсынла. Мындан ары баласыны ачыуун бир ана да сынамасын. Быллай къыйынлыкъ бир юйюрге да келмесин», - дейди ол. Биз да, таулу ананы ол тилегин Аллах къабыл этсин, дейбиз.

ТЕШЕЛЛЕУЛАНЫ Зульфия.