Арттотур (апрель) айны 16-да Къарачай-Черкес Республикадан Украинада бардырылгъан аскер къаугъагъа юч машина ашырылгъанды. Аланы Социал фондну регионал бёлюмюню къуллукъчулары джибергендиле. 

«Машинала Эресей Федерацияны Социал страхование фонду бла Пенсион фондунда 2023-чю джылгъа дери хайырландырылгъандыла. Аланы хар нелери да джарашыб эдиле. Бизни бу биринчи акциябыз тюлдю. Социал фондну ёсюмюню бёлюмю озгъан джыл да Эресейни джангы субъектлерине беш машина берген эди. Аны тышында биз аскер къаугъагъа гуманитар болушлукъ, ашарыкъ, суу, дарманла, башха керекли затла табдыргъанлай турабыз», - дегенди Социал фондну КъЧР-де бёлюмюню тамадасы Аслан Озов.
Машинала 34-чю номерли стрелковый бригадагъа берилликдиле.
«Была, тюрлю-тюрлю федерал структураладан берилген биринчи машинала тюлдюле. Аланы кёб джерлерин бир тюрлю этиб, таб джарашдырыб, медицина къуллукъчулагъа берликдиле», - дегенди Бютеуэресей Халкъ фронтну КъЧР-де толтуруучу комитетини тамадасы Каппушланы Людмила.
Алгъаракъда «Всё для победы» деген проектни тамалында мотострелковый бригадагъа Къарачай-Черкесияда Кърал урунуу инспекциядан юч «Нива» бла, бир «Шкода» машина берилгенди. Аланы барыны да халлары иги эди. Ала Эресей Федерацияны Правительствосуну, «Ишде заманы чыкъгъан машинаны ары иерге керекди» деген бегимини тамалында ашырылгъандыла.
КъЧР аскер къаугъагъа биринчи кюнюнден огъуна бизни джердешлерибизге болушлукъ табдырыб башлагъанды. Ол иш Бирикген республикан штабны аскерчилеге, аланы юйдегилерине болушлукъ табдырыу джанындан этиб кюрешген джумушларыны бириди. Ол КъЧР-ни Башчысы Темрезланы Рашидни аманаты бла къуралгъанды. Украинада аскер къаугъа башланнганлы бери Къарачай-Черкесиядан ары минг тонна джюк ашырылгъанды.