Къарачай-Черкесияны 6-чы кере сайланнган Халкъ Джыйылыууну (Парламентини) депутатлары кёзюулю 53-чю сессияны бардыргъан эдиле бу кюнледе.
Ала, Парламентни Председатели Александр Ивановну башчылыгъы бла, 20-дан аслам соруугъа къарагъан эдиле.
Федерал законла тюрлендирилгенлери себебли, сайлаула бла байламлы бёлек регионал законнга да тюрлениуле кийирилдиле.
КъЧР-ни «О выборах депутатов Народного Собрания (Парламента) Карачаево-Черкесской Республики» деген законуну 20-чы эмда 51.1-чи статьялары джангыртылгъандыла.
Аны кибик, Къарачай-Черкес Республиканы «Об Избирательной комиссии Карачаево-Черкесской Республики» эмда «О референдуме Карачаево-Черкесской Республики» деген законларына тюрлениуле кийирилгендиле. Ол тюрлениуле къазауат болумда тургъан джерледе сайлауланы бардырыуну энчи шартларыны хакъындандыла.
«О государственной гражданской службе Карачаево-Черкесской Республики» деген законда джангы тюрлениулеге кёре, кърал эмда муниципал къуллукъгъа кирирге излеген адамла бирча формалы анкеталаны толтурургъа керекдиле. Анда джазылгъан затла ол адамны ишге алгъанны излеми бла тинтилирге боллукъдула. Ол анкетада ишге кирирге излеген адам терс неда ётюрюк зат джазса, ишден кетерилирге боллукъду.
КъЧР-ни «О внесении изменений в отдельные законодательные акты Карачаево-Черкесской Республики в сфере концессионных соглашений» деген законопроекти экинчи окъулууунда къабыл этилгенди. Ол проектге кёре «Об управлении государственной собственностью Карачаево-Черкесской Республики» деген законнга къошакъ этилликди.
Башында айтылгъан законопроектни тамалында «О бюджетном процессе в Карачаево-Черкесской Республике» деген законну 32-чи статьясыны 1-чи кесегине да къошакъ этилгенди. Ол законопроект къабыл этилгенинде, депутатла Парламентни «О согласовании проекта концессионного соглашения о финансировании, создании и эксплуатации объектов теплоснабжения в городе Черкесске» деген Бегимин да къабыл кёрдюле.
«Об установлении порядка определения органами местного самоуправления Карачаево-Черкесской Республики дохода граждан и постоянно проживающих совместно с ними членов их семей и стоимости подлежащего налогообложению их имущества в целях признания граждан нуждающимися в предоставлении жилых помещений по договорам найма жилых помещений жилищного фонда социального использования» деген законну 1-чи статьясына да джангы тюрлениуле кийирилгендиле.
Энди юйдегиде адам башына ортача тюшген хайырны санагъан заманда эсебге алынныкъ адамланы саны азайтылгъанды.
Аны кибик, тюшген хайырны санагъан заманда эсебге къуру ачха бла келген хайыр алынныкъды. Башха тюрлю тюшген хайыр эсебге алынмайды. Энчи табышлылыкъ бла кюрешген адамны хайырын эсеблеген заманда, этиллик джоюмлары бары да тергелиб, андан къалгъаны саналлыкъды.
«О внесении изменений в отдельные законодательные акты Карачаево-Черкесской Республики» деген законну проекти къабыл этилгенди.
Экинчи окъулууунда «О внесении изменения в статью 3.2 Закона Карачаево-Черкесской Республики «О социальной поддержке отдельных категорий ветеранов» деген регионал законну проекти да къабыл этилгенди.
Ахырында Къарачай-Черкесияны кърал саугъаларына къошакъгъа берилген премияланы ёлчемлерин аслам этген эки бегимни проектлери да къабыл этилгенди. Ала бла, «Къарачай-Черкес Республиканы аллында джетишимлери ючюн» деген орденнге къошакъ премияны ёлчеми 50 минг сомдан 75 минг сомгъа джетдирилликди, республиканы тюрлю-тюрлю санагъатларыны «Махтаулу къуллукъчусу» бла «Халкъ къуллукъчусу» деген атла ючюн да 10 минг сомну орнуна 20 минг сом ачха саугъа берилликди.
ХУБИЙЛАНЫ Фатима.
