Байрым айны 7-де КъЧР-ни Башчысы Темрезланы Рашид Къарачай-Черкесияда Юйдегини джылын официал халда ачханды.

Юйдегини джылын ачыугъа аталгъан къууанч джыйылыугъа КъЧР-ни Халкъ Джыйылыууну (Парламентини) Председатели Александр Иванов, РФ-ны Кърал Думасыны депутаты Ёзденланы Солтан, КъЧР-ни Правительствосуну Председатели Мурат Аргунов, Правительствону келечилери, Парламентни депутатлары, республиканы шахарлары бла районларыны администрацияларыны башчылары, дин къуллукъчула, джамагъат бирлешликлени келечилери, Къарачай-Черкесияны шахарлары бла районларындан юйдегиле къошулгъан эдиле.
Темрезланы Рашид кесини сёзюнде Эресейде Юйдегини джылын къралны Президенти «Россия» деген халкъла арасы кёрмючде-форумда бардырылгъан «Родные – любимые» деген Бютеуэресей юйдеги форумну тамалында ачханын эсге салгъанды.
«Юйдеги Эресейни къраллыгъыны адеб-намыс тамалыды. Аны ючюн бютеу къралыбызда, Къарачай-Черкесияда да юйдегилеге не джаны бла да болушлукъ этиледи. Сабийлери болгъан юйдегилеге деб къуралгъан болушлукъ мадарланы саны джылдан джылгъа ёсюб барады. Кёб сабийли юйдегилеге уллу эс бёлюнеди, аланы статусларын федерал дараджада къралыбызны Президенти бегитгенди. Спецоперациягъа къошулгъанланы юйдегилерине да къолубуздан келгенича болушабыз.
Аналыкъ бла сабийликге, юйдегиге болушлукъ этиу къралны эмда джамагъатны баш ишлеридиле. Кёб сабий ёсген юйдеги бир-биринге дагъанлыкъ этиу, гитчелеге къайгъырыу, уллуланы сыйларын кёрюу дегенча адетлени юлгюсюдю. Арт джыллада Къарачай-Черкесияда кёб сабийли юйдегилени саны 14 процент чакълы бирге ёсюб, 11 мингнге джууукълашханды», - дегенди Темрезланы Рашид.
Республиканы Башчысы чертгенден, озгъан джыл республикада сабийлери болгъан юйдегилеге джораланнган регионал болушлукъ мадарла кенгертилгендиле, республикан Ана капиталны, ючюнчю сабий туугъаны ючюн бир кере берилген выплатаны ёлчемлери ёсдюрюлгендиле, кёб сабийли юйдегиледен колледжледе окъугъанлагъа болушлукъ этиледи, спецоперациягъа къошулгъанлагъа регионал дараджада социал контракт къуралгъанды.
Темрезланы Рашид республикада Юйдегини джылын бардырыу бла байламлы план джарашдырылгъанын да айтханды. Сёз ючюн, быйыл Черкесскеде сабий поликлиниканы ремонту башланныкъды, сабий садлагъа да тамамлы ремонт этилликди. Аны бла да къалмай, Юйдегини джылында республиканы шахарлары бла эллерине сабий площадкала салынныкъдыла.
КъЧР-ни Башчысы айтханнга кёре, кърал болушлукъ мадарла, демография политика, социал объектлени къурулушу бла байламлы проектлени толтуруу, шахарла бла эллени джарашдырыу адамланы джашау дараджаларын игилендирирге себеб боллукъдула.
Темрезланы Рашид Къарачай-Черкесияны шахарларындан, районларындан келген юйдегилеге, юйдеги адетлени сакълагъанлары эмда сабийлени ариу халда ёсдюргенлери ючюн, Бюсюреу къагъытла бергенди.
Къууанч джыйылыуну кёзюуюнде республиканы белгили артистлери концерт да кёргюзгендиле.
Ызы бла 45 джылны бирге джашагъан, 5 сабий бла 15 туудукъну ёсдюрген Аджиланы юйдегилери сахнагъа чыгъыб, юйдеги джылыуну белгисин – «Сердце России» деген Бютеуэресей юйдеги белгини – джаш юйдеги Валерий бла Виктория Хирныйлеге бергендиле.
Республикада Юйдегини джылы ачылгъан кюн республиканы шахарлары бла районларындан 12 джангы юйдеги къуралгъанды. Анга аталгъан къууанч Черкесскеде ЗАГС-да ётгенди.