Багъалы миллетим, «Къарачай» газетни сыйлы окъуучулары!
2024-чю джылны экинчи айы да тири джюрюш бла тамамланыргъа джетиб барады. Алай а, кеч болса да, озгъан джылны эсеблерин чыгъара, быйылгъа муратларыбызны юсюнден хапар айтыргъа излей эдим.
Бюгюнлюкде газетибизни тиражы 4607 экземплярды. Ол, озгъан джылгъа кёре, 115 процент болады. Аллахха минг кере шукур бизни миллетибиз былай бир-бирин тутхан, хар кюнде бир-бирин эшитирге хазыр, къайгъырыулу болгъаны ючюн. Аллах айтса, 2024-чю джылны экинчи джарымында да газетге джаздырыу ишни тири бардырырбыз деб ышанама. Айхай да, джарсыуларыбыз да бардыла – бир къауум элледе почтальонла джетишмейдиле, бир-бир элледе почта бёлюмле да бир бёлек сагъатха ачыладыла, ишлерге адам табылмагъаны амалтын. Алай болса да, «былайда быллай джарсыу барды, не этейик?» деб, башыбыздан тутуб турмай, алгъа барсакъ, эшта, бет джарыкълы боллукъ болурбуз деб, ишексизме.
Мындан алда да джазгъан эдик, къарачай миллетибизни тукъум башчыларына энтда бир кере джюрек разылыгъымы билдирирге излейме, бары да бирча ёрге къобуб, адамларына хапар джайыб, кече бла кюнню ичине газетге джаздырыу ишни тири бардыргъанлары ючюн. Мындан ары да ала этген ашхы, халкъгъа хайырлы ишлени юслеринден эшите, газетибизни бетлеринде да окъуй турурбуз деб ышанама.
2024-чю джыл биз барыбыз да чексиз сюйген «Къарачай» газетибизге уллу байрамны джылыды, быйыл ол чыгъыб башлагъанлы 100 джыл толады. Ол байрамны къууанч халда къачда, аууз-герги айда, белгилерикбиз, Аллах айтса. Ары дери уа, мадарыбызгъа кёре, газетибизни тарихинден, аны бюгюннгю ишчилерини, ишлеб кетген, дунияларын ауушдургъан коллегаларыбызны, айхай да, бир ёмюрню узагъына газетни чыгъыууна джууаблы баш редакторланы юслеринден да аны бетлеринде хапар бергенлей турлукъбуз.
100 джыл. Бир ёмюр! Аланла, бир сагъыш этигиз, 100 джыл джашагъан къартха сукъланабыз, аны джашау сынамы, акъылманлыгъы уллу болгъанына ишексизбиз. Да сора бизнича, гитче тау миллетни тилинде чыгъыб тургъан газетге 100 джыл деген къаллай бир затды!
Алай эсе уа, келигиз, барыбыз да биригиб, миллетибизни бу уллу байрамын бирге белгилейик быйыл. Джазыгъыз, хапар айтыгъыз, «Къарачай» газет бла къалай танышханыгъызны, газетде артыкъ да бек къайсы рубрикаланы сюйгенигизни, къаллай джангылыкъла, джангы рубрикала кёрюрге излегенигизни юсюнден. Дагъыда газет бла байламлы сейир хапарларыгъызны да сюйюб окъурукъбуз, кёзюу-кёзюую бла басмалай барыргъа кюреширикбиз.
«Къарачай» газет къарачай халкъны тилинде чыкъгъан джангыз газетибизди, алай эсе уа, аны байрамы барыбызны да байрамыбыз болургъа керекди.
Ахырында энтда бир айтырым: бизни кибик, быйыл 100-джыллыкъ байрамларын республикада черкес тилде чыкъгъан «Черкес хэку», Къабарты-Малкъарда малкъар тилде чыкъгъан «Заман» газетле да белгилерикдиле. «Къарачайны» келир номерлерини биринде аланы юслеринден да толу хапар берликбиз.
Джаздырыгъыз газетни, окъугъуз, хапарлы болугъуз, байрамыбызны къууанчын бизни бла бирге байрамлагъыз, багъалы миллетим.
ХУБИЙЛАНЫ Фатима.
