Бу кюнледе КъЧР-ни Правительствосуну Юйюню Гитче залында республиканы Правительствосуну Председателини орунбасары Евгений Поляковну башчылыгъы бла Къарачай-Черкесияны «Россия» деген халкъла арасы кёрмючге-форумгъа къошулуууну хакъындан къурау комитетни кенгеши ётгенди.

Кенгешни кёзюуюнде Къарачай-Черкесияны экспозициясыны макетин къурауну юсюнден докладла этилгендиле. Аны бла бирге форумда бардырыллыкъ кёрмюч-джармалыкъ ишле, джарыкълыкъ-кёз ачыу программа да сюзюлгендиле.
«Ближе к горам. Ближе к людям. Ближе к звёздам» деген сёзле Къарачай-Черкес Республиканы экспозициясыны тамалын къурайдыла. Аны юсюнден мындан алгъа КъЧР-ни Башчысы Темрезланы Рашид кесини Телеграм-каналында билдирген эди. Ол «Россия» деген кёрмючню экспозициялары ашхы, деу къралда джашагъаныбызгъа ёхтемлик келтирлигин да чертгенди.
«Россия» деген халкъла арасы кёрмюч-форум РФ-ны Президентини буйругъу бла Москвада ВДНХ-да быйыл абыстол (ноябрь) айны 4-ден 2024-чю джылны арттотур (апрель) айыны 12-не дери барлыкъды. Анга РФ-ны субъектлери, толтуруучу властны федерал органлары, джамагъат бирлешликле, кърал корпорацияла, тыш къралланы келечилери да къошуллукъдула.