Бизни республикада «Лучший учитель родного языка и родной литературы - 2023» деген Бютеуэресей конкурсну ахыр кёзюую бардырылды.
Черкесскени 19-чу номерли гимназиясында билимлерин, тириликлерин, чыгъармачылыкъ кючлерин таныта бардыргъан ишлерин санагъат излемни тамалында къурадыла. Мастер-классла, «тёгерек столла», устазны фахмусун, билимин ачыкълагъан дагъыда башха ишле болдула. Къыркъаууз (сентябрь) айны 22-де «Лучший учитель родного языка и родной литературы - 2023» деген Бютеуэрсей конкурсну 5-чи кюнюнде конкурсну лауреатлары «Классный час» сынауну ётдюле.
Ол «Духовно-нравственные ценности народов России: единство и многообразие» деген темагъа бардырылды. Конкурс тинтиулени тамалы сайланнган теманы магъанасын, аны кертилигин, бардырылгъан дерсни методика эмда психология-методика джаны бла хайырын, юретиу ишлени чыгъармачылыгъын, тилни культурасын ачыкълау эди.
Конкурсну жюриси эндиги кёзюуге кёчген алты адамны белгиледи. Ала Башкортостан Республикадан Гузель Гайсина, Владимир областдан Артём Гусев, Къабарты-Малкъар Республикадан Асият Кушева, Саха (Якутия) Республикадан Кэскилээнэ Лукина, Коми Рспубликадан Елена Расовая, Татарстан Республикадан Алиня Шагараева эдиле.
«Лучший учитель родного языка и родной литературы - 2023» деген Бютеуэресей конкурсну Эресей Федерацияны Билим бериу министерствосу бардырады. Аны баш мураты ана тил бла ана адабиятны устазларын джакълау, алагъа болушуу, ана тилге юретиуде алчы сынамны джайыу эди.
Къыркъаууз (сентябрь) айны 23-де «Лучший учитель родного языка и родной литературы - 2023» деген Бютеуэресей конкурс ишин тамамлады. Ана тиллеринде дерс берген устазла, юретиучюле Черкесскеде Эресей Федерацияны билим бериу министри Сергей Кравцов эмда Къарачай-Черкесияны Башчысы Темрезланы Рашид бла тюбешдиле.
РФ-ны билим бериу министри Къарачай-Черкес Республикагъа, Эресейде ана тил бла ана адабиятны иги устазлары бла тюбешиб, аланы алгъышларгъа деб, иш этиб келген эди.
«Лучший учитель родного языка и родной литературы - 2023» деген Бютеуэресей конкурсну уллу магъанасы барды. Мен сагъыш этгенден, бизни кёб миллетли къралыбызда хар бир миллетни тилин сакъларгъа, ёсдюрюрге тыйыншлыды. Бюгюнлюкде биз сейирлик республиканы джериндебиз. Мында халкъла бир-бири адетлерин сыйлайдыла, багъалатадыла. Арада шохлукъну кючю бегигенлей турады», - деди Сергей Кравцов кесини алгъышлау сёзюнде.
«Мен Билим бериу министерствогъа, конкурс бизни республикада бардырылса, деген тилегими джакълагъаны ючюн, разылыгъымы билдиреме. Багъалы педагогла, сизни бетигизге къууаныб къарай, хар биригизде, кёб миллетли Эресейни бирер субъектин кёреме. Сабий ана тилге гитче заманындан юрениб башларгъа керекди. Ол биринчи сёзюн ана тилинде айтыб башларгъа юренеди. Алайда ата бла ана бек къайгъырыргъа керекдиле. Андан сора ана тилни ёсюмюне устазла джууаблыдыла. Мен сизге уллу сый бере, барыгъызны да Къарачай-Черкесияны джеринде хакъ джюрекден алгъышлайма!» - деди Темрезланы Рашид финалистлеге.
Конкурсда хорлагъанла ол тюбешиуде Сергей Кравцов бла Темрезланы Рашидге соруула бериб, бу аламат джерде, быллай сейир конкурс мийик дараджада къуралгъаны ючюн, алагъа разылыкъларын билдирдиле.
Хорлагъанла, ёчлю орунланы алгъанла алайдан Черкесскеде «Джашил айрымканда» амфитеатргъа бардыла.
Мында олтурур джер джокъду, амфитеатрны ичи адамдан толуду. Устазла, атала, анала, сабийле, власть органланы, Окъуу министерствону къуллукъчулары, джамагъат организацияланы келечилери, КъЧР-ни Парламентини (Халкъ Джыйылыууну) депутатлары, РФ-ны Билим бериу министерствосундан, башха джерден келген къонакъла бардыла.
Былайда «Лучший учитель родного языка и родной литературы - 2023» деген Бютеуэресей конкурсну джабылыуу къууанч халда бардырылды. Эресей Федерацияны билим бериу министри Сергей Кравцов бла Къарачай-Черкесияны Башчысы Темрезланы Рашид конкурсда хорлагъанлагъа, ёчлю орунланы алгъанлагъа саугъала бердиле.
«Биз ана тил бла адабиятдан дерс бериуню иги затларын ачыкълайбыз. Бу конкурс экинчи джыл бардырылады. Эресей Федерацияны Президенти Владимир Путин быйылны Устаз бла насихатлыкъ этгенни джылыды, деб баямлагъанды. Ол зат педагогну усталыгъыны магъанасы уллу болгъанын ачыкълайды, устаз джерни юсюнде эм баш усталыкъ болгъанын чертеди. Бек сау болугъуз, багъалы коллегала!» - деди Сергей Кравцов.
Аны ызындан сёз Къарачай-Черкесияны Башчысы Темрезланы Рашидге берилди.
«Быллай фахмулу педагогланы, кеслерини усталыкъларын иги билген ашхы адамланы бизге къонакъ этиуге биз терен эс бёлдюк. Ол зат бизге къууанчды, сыйды, адамланы бирикдиреди. Ала бизни Ата джуртубуз, Эресей, аламат, уллу, болгъанын кёргюздюле. Конкурсха къошулгъанланы хар бири кече джукъламай, кюндюз тынгы табмай, алчы оруннга чыгъар муратда устазлыкъ фахмусун, билимин, чыгъармачылыкъ кючюн ачыкълай, кёб къыйын салгъанды. Аланы коллегалары, эт джууукълары, тенглери, шохлары, сабийлери да къайгъырыб, кёлтюргючлюк этерге кюрешгенлей тургъандыла.
Бу ашхы конкурсда хорлагъанланы, конкурсха къошулгъанланы барын да таза джюрекден алгъышлайма. Сергей Сергеевичге, Эресейни Билим бериу министерствосуну командасына, бу конкурсну бизни республикада къурагъанлары ючюн, бек разыма. Конкурсха школгъа дери учреждениелени да къошаргъа деген оюмгъа да бек къууандым. Сабий сад бла школну арасында, артыкъсыз да, тилни юсюнде, аллай байламлылыкъ тутууну уллу магъанасы барды.
Сау болугъуз, маданият хазнаны сакъларгъа, дерс бериуню иги практикасын ёсдюрюрге, Эресейни келир тёлюсюн тыйыншлы юретирге терен къайгъыргъаныгъыз ючюн. Къарачай-Черкес Республиканы джерине келгенигиз ючюн сизге джердешлерими атындан энтда да бир кере джылы салам береме, барыгъызны да алгъышлайма. Уллу Эресей къралыбызгъа рахатлыкъ, мамырлыкъ, мелхумлукъ, джашнау, джангы хорламла теджейме», - деди Темрезланы Рашид.
Эресейде ана тилден эм ашхы устазланы атлары амфитеатрны сахнасында айтылдыла. Бютеуэресей конкурсда Владимир областдан Артём Гусев, Коми Республикадан Елена Расовая, Башкортостан Республикадан Гузель Гайсина хорладыла.
«Лучшие практики развития родной речи детей дошкольного возраста» деген номинацияда Татарстан Республикадан Айсыла Лотфуллина, Мордовия Республикадан Марина Федотова, Донецк Халкъ Республикадан Елена Цыбина хорлагъандыла.
Ёчлю орунланы алгъанлагъа Хурмет грамотала, ачха сертификатла берилдиле.
Андан сора джыйылгъанлагъа концерт программа кёргюзюлдю. Алайда бизден, башха республикаладан келген артистле, ансамблле аламат концерт кёргюздюле. Ахырында Къарачай-Черкес Республиканы махтаулу артисти Текуланы Амур «Россия - Родина мать» деген джырны джырлады.
КъЧР эстафетаны Татарстан Республикагъа берди. 2024-чю джыл «Лучший учитель родного языка и родной литературы» деген конкурс анда бардырыллыкъды.
«Лучший учитель родного языка и родной литературы - 2023» деген конкурсну ахыр сынамы Эресейни эки регионунда бардырылгъанды. Къарачай-Черкесиягъа 72 устаз келгенди, Терк Башы Тегейге школгъа дери окъуу учреждениелени 32 юретиучюсю баргъанды.
Лепшокъланы
Хусеин.
