Джуртубузну керти патриоту, ётгюр уланы, Эресей Федерацияны Сауутлу кючлерини мийик дараджалы устасы, генерал-майор Боташланы Хусейни джашы Къанамат кесини джашау джолун авиациягъа атаб, джюрек учунмакълыгъы бла лётчик болуб, джууаблы борчларын деменгили баджарыб тургъанды.

Боташ улу учакъсыз, чексиз кёксюз джашауну кёзюне да кёргюзмегенди.
Ол, айтылгъан лётчик болуб, къралыбызгъа хакъ джюреги бла бек кёб заманны къуллукъ этиб тургъанды. Боташланы Къанамат генерал-майор чында аскер къуллугъундан кетиб, джаш адамланы кесини усталыгъына юрете тургъанлай, къарнаш халкъны миллетчиледен азатларгъа джораланнган аскер къаугъа башланнганында, анга кеси разылыгъы бла къошулгъанды.
7 тюрлю аскер учакъны «джюздюре» билген Къанамат, аскер къаугъаны кёзюуюнде, бир ай чакълы бирни кесини аскер борчларын бюсюреулю толтургъанды. Ол, ата-бабаларыбызча, Ата джуртубузну миллетчиледен къоруулар ючюн, уллу джигитликле этгенди.
Ахыр кере уа ол джауну техникасын, огъун-тобун къурутуб, ызына къайтыб келе тургъанлай, бизни аскерчилерибиз миллетчилени къуршоуларына тюшгенин билгенинде, кесине къоркъуу болгъанын да биле тургъанлай, ол алагъа болушургъа ашыкъгъанды. Боташ улу джауну башындан окъ-тоб атыб джунчутханы бла бизни аскерчилерибиз къуршоудан чыкъгъандыла. Алай а, кесибизникилени къутхарама деб, джерге джууукъ баргъаны бла миллетчиле да аны кесин ышаннга алгъандыла. Ала, ракета джибериб, Боташланы Къанаматны самолётун джандыргъандыла. Алай бла батыр джердешибиз эресейчи аскерчиле ючюн джанын бергенди, Аллахны рахматында болсун.
Ол бюсюреулю иши ючюн, РФ-ны Президенти Владимир Путинни 2022-чи джыл никкол (июнь) айны 1-де чыкъгъан 334-чю номерли буйругъу бла Боташланы Хусейни джашы Къанаматха «Эресей Федерацияны Джигити» деген сыйлы ат аталгъанды.
Аны патриотлугъу, антына кертилиги, Ата джуртуна сюймеклиги бизни барыбызгъа да юлгюдю.