Къарачай-Черкесиягъа Эресей Федерацияны билим бериу министри Сергей Кравцов келгенден сора, КъЧР-ни Башчысы Темрезланы Рашид Эресейни 10-чу – 11-чи классларыны сохталарына аталгъан тарихден окъуу китабны сюзюу бла ары дери башланнган ушакъны андан ары бардыргъанды – сёз СССР-ни депортациягъа тюшген миллетлерини хакъындан баргъанды. Белгилисича, аланы ичлеринде къарачай халкъ да болгъанды.
- Бу тема бла Ишчи къауум кюрешгенли ыйыкъдан аслам болады, аны къурамына репрессиягъа тюшген халкъланы субъектлерини башчылары эмда Эресей Федерацияны Билим бериу министерствосуну башчылыкъ этген къаууму киргендиле. Ишчи къауумну оюму бла окъуу китабны автору Владимир Мединский шагъырей болгъанды. Ол кёчгюнчюлюк бла байламлы материал тюрлендирилмегенлей эски китабладан алыннганын эмда аны тыйыншлысыча тюзетирге хазыр болгъанын билдиргенди.
Сергей Сергеевич бла окъуу китаблагъа кёчгюнчюлюкню юсюнден тюзюча джазаргъа келишгендиле. Китабха тюшерик затны барысына да Ишчи къауум, къараб, багъа берликди.
Къралыбызны кёб миллетли халкъы Ата джуртубузну сакълар ючюн, кёчгюнчюлюкге тюшген халкъла да аланы ичлеринде, бир джумдурукъ болуб кюрешгенди, джанын артха салгъан болмагъанды. Уллу Ата джурт къазауатны кёзюуюнде къарачай миллетни келечилери республиканы эмда къралны башха халкълары бла бирге Джуртубузну сакълауда ётгюрлюк эмда джигитлик танытхандыла. Бюгюнлюкде да аскер къаугъагъа къошулуб, кърал салгъан борчну сый бла толтурадыла.
Кёб тюрлю миллетни бирлиги Эресей Федерацияны сынмазлыкъ кючюдю. Алай айтады бизни Президентибиз Владимир Владимирович Путин. Анга кёре къуралгъанды кърал миллет политика. Президент халкълагъа джетген репрессия зарауатлыкъны терс атламгъа эмда уллу аманлыкъгъа санайды.
Мени кесими оюмум – кёчгюнчюлюк къыйынлыкъ джетген миллетлени юсюнде тарих тюзлюкню терсейтирге боллукъ тюлдю. РФ-ны билим бериу министрине, бу ишни юсюнде бизни джанлы болгъаны ючюн, разылыгъымы билдиреме. Бу зат бла ойнаргъа керек тюлдю. Бизни сабийлерибиз кёб миллетли уллу къралыбызны джигитликге бёленнген тарихин керти болгъаныча окъурукъдула, деб ышанама, - деб чертгенди Темрезланы Рашид.
