КъЧР-ни чарпыуладан тюшген заранны тюзетген эмда отдан къоркъуусузлукъну бегитген, аны кибик граждан къорууланыу ишлеге къарагъан управлениесини тамадасы Алботланы Роберт мындан алда уллу джауумдан джетген зарауатлыкъны терк тюзетгенлери ючюн чарпыуладан къутхарыучу республикан къуллукълагъа разылыгъын билдиргенди.

Элия (июль) айны 28-де уллу джели бла джаугъан къаты джангур Черкесск шахар округда тереклени аудуруб, мекямланы башларын, тюкенлени белгилерин алыб атыб, электрокъууат чыбыкъланы юзюб, хар нени халек этген эди. Ол къалабалыкъда адамла ачыгъанлары да болгъан эди.
Ол къалабалыкъда Къарачай-Черкесияны къутхарыучулары табигъат кючден джетген хыянатны тюзетген эдиле. Ала кёб фатарлы юйлени арбазларын, орамланы аугъан терекледен терк огъуна тазалаб чыкъгъан эдиле.
Табигъат кючден джетген хыянатны тюзетирге МЧС-ни КъЧР-де управлениесини, КъЧР-ни чарпыуладан тюшген заранны тюзетген эмда отдан къоркъуусузлукъну бегитген, аны кибик граждан къорууланыу ишлеге къарагъан управлениесини, Черкесск шахарны бютеу коммунал къуллукъларыны келечилери бла къайгъырыулу адамла чыкъгъан эдиле.
Бу кюнледе Алботланы Роберт «Карачаево-Черкесская аварийно-спасательная служба» РГБУ-ну ол кёзюуде тирилик танытхан къуллукъчуларына КъЧР-ни Башчысы Темрезланы Рашидни атындан бюсюреу этгенди.