Карачай-Черкесияны Башчысы Темрезланы Рашид регионну Правительствосуну Председатели Мурат Аргуновгъа республиканы районларына айланыб, аланы социал-экономика болумларындан толу хапарлы болургъа, джарсыуларын къоратыр мадарла этерге борч салгъанды.
Этилген оноугъа кёре, республиканы Правительствосуну Председатели Къарачай-Черкесияны районларыны джарсыуларындан толу хапарлы болгъанындан сора аланы хар бирине кереклини белгилеб, муниципал къуралышланы инвестицион паспортларын хазырларгъа керекди.
Ол паспортлагъа муниципал къуралышланы социал-экономика болумлары, инвестицион хыйсаблары, алада джашау турмушну игилендирир ючюн амалсыз этилирге керекли джумушла аны кибик башха информация тюшюрюллюкдю.
КъЧР-ни Башчысы Темрезланы Рашид аллай паспортла къуралыргъа кереклисин республиканы Халкъ Джыйылыууна (Парламентине) Чакъырыу этген кёзюуюнде айтхан эди.
Мурат Аргунов, Темрез улу салгъан борчну толтура, бу кюнледе Уруп районнга баргъанды. Ол иш нёгерлери бла бирге ол районну социал магъаналы объектлерине, джарашдырыучу производство бла кюрешген предприятиелеге айланнганды, машина джолланы халларына да къарагъанды.
Уруп районну Преградна стансесини 2-чи номерли орта школунда, Псемен элни орта школунда, Курджиново элни 1-чи номерли орта школунда, Медногорский посёлокда лицейде келир джыл ремонт ишле башланныкъдыла. Тёрт билим берген учреждение да толу джангыртыллыкъды.
КъЧР-ни Правительствосуну Председатели Мурат Аргунов ол школлагъа барыб, аланы директорлары бла тюбешгенди. Алагъа ремонт «Модернизация системы школьного образования в Карачаево-Черкесской Республике» деген регионал проектни тамалында этиллигин да айтханды.
Дагъыда Курджиново элде келир джыл «Кавказ-гранит» деген проектни тамалында сослан ташны джарашдыргъан завод ачаргъа план салыннганды. Ол планнга кёре, джангы заводда бир кёзюуге 2 минг тонна чакълы бир таш ууатылыб барлыкъды. Анда 80 джангы иш орун да ачыллыкъды.
Мурат Аргунов «Кавказ-гранит» деген проектни тамадасы бла тюбешиб, аны толтуруу къалай баргъаныны юсюнден хапар соргъанды. Ол тюбешиуде регионал дараджада джарашдырыучу производствону ёсюмюне кёлтюргючлюк этилген адет болгъаны да айтылгъанды.
Мындан алда КъЧР-ни Башчысы Уруп районну адамлары бла тюбешиу бардыргъан кёзюуюнде ала оюла тургъан поликлиникаларыны орнуна джангы ишленсе деб тилегенлеринде, Темрез улу Преградна станседе джангы амбулаторияны къурулушун башлатхан эди.
Бюгюнлюкде амбулатория бусагъатдагъы заманны излемлерине кёре джарашдырыла турады. Ол къыркъаууз (сентябрь) айда ишлеб башларыкъды. Ол ачылгъанлай анда бир кёзюуге (смена) 240 адамгъа къарар-джарар мадар боллукъду.
КъЧР-ни Башчысы Темрезланы Рашид республиканы Халкъ Джыйылыууна (Парламентине) Чакъырыуунда агъачны джарашдыргъан предприятиелени ишлерин алгъа бардырыр ючюн, аланы хар бирине квотала берирге деген эди.
Уруп районнга баргъан кёзюуюнде Мурат Аргунов агъачны джарашдыргъан предприятиелени келечилери бла тюбешиб, алагъа регионал дараджада кёлтюргючлюк этиллигин айтханды. Табышлылыкъ бла кюрешгенле КъЧР-ни Промышленность ёсюмюню фондундан льгота халда ёнгкюч ачха алыргъа боллукъларын билгенлеринде, къууаннгандыла.
Джууукълашыб келген джылыу берген кёзюуге Уруп элде табигъат газ хайырландырылыб башланныгъы да иги хапарланы бири болгъанды.
КъЧР-ни Правительствосуну Председатели Мурат Аргунов Урупну котелнясыны газ бла ишлерге хазырлыгъына да къарагъанды.
Анда ол ишге джууаблы къуллукъчула, Правительствосуну Председателине хар нени кёргюзе, газ керекле джарашдырылыб, къач болгъанлай ишлеб башларгъа хазыр этилгенлерини хапарын айтхандыла.
Мурат Аргунов да, ол котелнядан джылыу социал магъаналы объектле бла 800 юйге барлыгъын черте, хауа болум сууукъгъа айланнганлай ол ишлеб башларгъа кереклисин къаты айтханды.
