Къыркъар (август) айны 14-де Къарачай-Черкесияны Башчысы Темрезланы Рашид орта билим берген учреждениелени джангы окъуу джылгъа хазырлыкъларын ачыкълаугъа аталгъан кенгеш бардыргъанды.

Ол кенгешге КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председателини орунбасары Евгений Гордиенко, КъЧР-ни къурулуш эмда фатар-коммунал мюлкюню министри Семенланы Ренат къошулгъандыла.
Кенгешде айтылгъаннга кёре, бюгюнлюкде бизни республикада 2389 сохтагъа джораланнган 5 школну къурулушу бардырыла турады. Ючкекенде 960 орну, Адыге-Хаблде 600 орну, Къарданикде 165 орну боллукъ школла ишленедиле. Черкесск шахарны 6-чы номерли школуна 400 сохта сыйынырча, Хабезде лицейге-интернатха да 264 сохта сыйынырча къошакъ мекямла ишлениб башланнгандыла. Ол объектле бары да келир джылда битдирилликдиле.
Дагъыда республиканы 24 орта школунда деменгили ремонт этиле турады. Аладан бешисин джангыртыб бошаргъа алкъын заман керекди. Къалгъанланы эшиклери уа къыркъаууз (сентябрь) айны 1-не кенг ачыллыкъдыла. Алагъа джюрюген сабийле джангы окъуу джылны хар нелери да джангыртылгъан, таб джарашхан класслада башларыкъдыла.
Темрез улу, кенгешде этилген докладлагъа тынгылагъанындан сора, къурулуш ишлени агъачлылыкъларына тыйыншлы эс бёле, белгиленнген болджалгъа баджарыб барыргъа кереклисин къаты айтханды.
Республиканы Башчысы: «Аллыбызда ыйыкъны къадалыб, къурулуш бла кюрешген къауумланы къызындырыб, школланы арбазларын айбат этиб, бютеу къурулуш багушну тазалаб бошаргъа керекди.
Джангы окъуу джылгъа школланы хазырларгъа устазланы заманлары джетиширча этигиз», - дегенди.