Августну 22-де – Россия Федерацияны Кърал байрагъыны кюнюнде - республиканы баш майданы адамдан толу эди. Ала бери къралны бу сыйлы байрамын этерге джыйылгъан эдиле.
Эртденбла заман он сагъат бола, Къарачай-Черкесияны Правительствосуну Председатели Озов Аслан, КъЧР-ни Халкъ Джыйылыууну (Парламентини) Председатели Иванов Александр, Къарачай-Черкесияны кърал властыны органларыны, джамагъат организацияларыны, политика партияларыны келечилери республиканы Правительствосуну Юйюню аллында майданда къуралгъан президиумгъа чыгъадыла. Къууанч митинг башланады.
Республиканы Правительствосуну Председатели Озов Аслан, майданнга джыйылгъанланы Къарачай-Черкесияны Башчысы Темрезланы Рашидни атындан байрам бла алгъышлай: «Хар заманда да Къралны байрагъы бизни иги урунургъа учундургъанлай, тамблабызгъа ийнандыргъанлай келгенди. Бюгюн да ол кесини бу магъанасын тас этмегенди. Бизни къарт аталарыбыз бла аталарыбыз, Кърал байракъны къолларына алыб, Уллу Ата джурт къазауатны кёзюуюнде къанлы джау бла сермешиулеге чыкъгъандыла. Аны кёзню гинджисинча сакълагъандыла, аны ючюн бизни къралыбызны кёб тёлюсюню адамлары джанларын да бергендиле. Биз фашизмни да бирикмеклигибиз бла, Къралны байрагъына берилмеклигибиз бла хорлагъанбыз, дуния дараджалы кърал да ол затларыбызны кючлери бла болуб турабыз. Аланы кючлери бла биз азатлыкъ бла демократияда уллу дараджалагъа чыкъгъанбыз. Адамны гражданин эркинлигин ёсдюргенбиз.
Джуртубузну политика, социал, экономика джашауларына тири къошула, къралыбызны эмда джамагъатыбызны не джаны бла да ёсдюрюрге тыйыншлы юлюш къоша, биз Къарачай-Черкесияны джарыкъ тамбласын къураргъа кесибизни тыйыншлы юлюшюбюзню къошабыз.
Къралны байрагъын сюерге, аны сыйын кёрюрге юретмей, биз джаш адамларыбызны Ата джуртну керти адамлары этиб ёсдюраллыкъ тюлбюз. Къралны байрагъы, аны Герби эмда Гимни, аны тюненеги хорламлары бла джетишимлерини белгилери болуб къалмай, аны келир заманыны да ышаннгылы белгилеридиле. Бизни туудукъларыбыз къраллары бла ёхтемленир ючюн, биз бюгюн къолубуздан келгенни барын этерге керекбиз. Къралны байрагъыны кюню бла алгъышлай, сизни барыгъызгъа да рахатлыкъ, кючлю саулукъ, ашхылыкъла, насыб, джангы джетишимле теджейме!» - деди.
Митингге келгенлени «Россия ючюн» Халкъ фронт» деген Бютеуроссия джамагъат къозгъалыуну регионал бёлюмюню исполкомуну башчысы Каппушланы Людмила, Къобан къазакъ аскерни Баталпашинск къазакъ бёлюмюню атаманы Бородкин Виктор, «Бирлик» деген ногъай джамагъат организацияны председатели Катаганов Исмаил, «Алашара» деген халкъла арасы абаза джамагъат организацияны башчысыны заместители Муков Мурат, «Адиюх» деген черкес джаш тёлю организацияны башчысы Мамхягов Давлет дагъыда башхала да алгъышладыла.
Шахарны «Джашил айрымкан» деген солуу бла культура паркында да Россия Федерацияны Кърал байрагъына аталыб тюрлю-тюрлю къууанчла, творчество тюбешиуле болдула. Библиотекалада темалы кёрмючле бардырылдыла.
Россия Федерацияны Кърал байрагъыны кюню бютеу республикада кенг белгиленди.
Алай бла бу сыйлы кюнню белгилеу Къарачай-Черкесияда Кърал байракъгъа кертиликни кёргюзген байрам болуб ётдю.
(Бизни корр.).
