Кёб болмай Къарачай-Черкесияны Башчысы Темрезланы Рашид КъЧР-ни Правительствосуну Председатели Озов Аслан бла ишни юсюнден тюбешиу бардыргъанды. Анда эки башчы республиканы социал-экономика ёсюмюню ишлерин сюзгендиле.
Озов Аслан республиканы Башчысына Къарачай-Черкесияны школ, школгъа дериги учреждениелерини джангы окъуу джылгъа хазыр болгъанларыны юслеринден хапар айтханды. Ол билдиргенден, сентябрны 1-де Кара-Пагода джангы окъуу комплекс: 140 сохтагъа школ, 40 сабийге сабий сад, Эркин-Халкъ элде 200, Зеленчукде 300 сабийге сабий садла ачыллыкъдыла. Ючкекен элде да 200 орну болгъан сабий сад хайырландырыугъа берир дараджагъа джетдирилгенди. Джангы окъуу джылдан башлаб Гитче Зеленчук элде да физкультура-саулукъ сакълау  комплекс ишлеб тебрерикди.


Темрезланы Рашид КъЧР-ни Правительствосуну Председателин билим берирге деб ишленнген джангы объектлени  тыйыншлы къуллукъчула бла, иш керекле бла эмда техника бла  толу баджарыргъа борч салгъанды.
Тюбешиуде келир 2018-чи джылны бюджетини проектин джарашдырыуну юсюнден да сёлешиннгенди. Правительствону Председатели Аслан Озов билдиргенден, келир джылны финанс документин хазырлауну иши башланыб, къызыудан къызыугъа кире барады.
КъЧР-ни Башчысы Темрезланы Рашид Правительствону Председателинден 2018-чи джылны бюджетин къурау ишге республикан властланы органлары бла кеслери кеслерине оноу этген джергили органла, аны кибик федерал органла тири къошулурча этерин излегенди. 

 
{jcomments}