Аллыбызда джууукъ заманда Къарачай-Черкесияда биринчи технопарк ишленникди. Бюгюнлюкде аны къурулушун башларгъа хазырланыу кюч ала барады. КъЧР-ни Башчысы Темрезланы Рашид республиканы промышленность бла сатыу-алыу министри Аргунов Мурат бла эмда республиканы рысхы эмда джер иш джюрютюулерини министри Поляков Евгений бла бирге аны проектин джашауда толтуруб башлауну биринчи атламларыны юслеринден сёлешгенди.
Кенгешде чертилгенден,  башында атлары сагъынылгъан министерствола, проектни толтурууну ал кёзюуюнде биригиб, бирге ишлерикдиле: марда базаны хазырлайдыла, технопарк орналлыкъ  джерни документлерин джарашдырадыла, ишни къолгъа аллыкъ  инвесторла бла сёлешиуле бардырадыла, башха ишлеге къарайдыла.

Технопарк Ногъай районда ишленникди.
Министрле КъЧР-ни Башчысына билдиргенден, белгиленнген проектни толтурур ючюн, ол ишге башчылыкъ этерик компания къураллыкъды. Ол кесини ишин резидентле бла бирге бардырлыкъды. Площадкада ишни бир неда талай промышленность компания къолгъа аллыкъды. Ала ал ишлерин этиб бошасала, объектни  къалгъан джумушларын этерге гитче эмда орта бизнесни предприятиелери келликдиле. Предприятиелени ол къаууму неден да алгъа технопаркны инфраструктурасын баджарлыкъ затланы ишлеу  бла кюреширикди.
Темрезланы Рашид, ол затланы айтыб бошагъандан сора, предприятие орналлыкъ, аны кибик аны коммунал инфраструктурасын баджарлыкъ объектле ишленник джерлени документлерин джарашдырыу бла байламлы этиллик джумушланы къайгъыларын не къадар дженгил кёрюрге чакъыргъанды ведомстволаны тамадаларын.

 
{jcomments}