Не тюрлю дараджада бардырылгъан къаугъа да иги тюлдю, эки джанындан да кёб адам ачыйды.

Къралыбызны Президенти Владимир Путинни этиб башлагъан ишин, Эресейни Украинада бардыргъан спецоперациясын мен тюзге санайма. Хаман тёзюб тургъанны магъанасы джокъду, къутуруб айланнганлагъа джууаб берирге керек эди. Бу созулуб барыб турса, рак аурууча, кемириб-кемириб онглаб барлыкъ эди. Спецоперация этилмей мадар болмады, энди бек тереннге кирмей, эки джаны да тюбешиб, келишиуле болсала деб, тилегим, излемим да олду.

Бизни миллетибиз 14 джылны азаб чегиб къайтханды. Киши джерде бизге да къарагъандыла, болушхандыла. Бизге да, сёз ючюн, Донбассдан, Луганск областладан джунчуб келгенле тюз адамла болсала, къолубуздан келгенича болушлукъ этерикбиз. Бизни республиканы миллетлери къонакъ сюйген адамладыла.

Спецоперациягъа баргъан джашлагъа уа, Уллу Аллахдан Джуртларыны аллында антларына толу болуб, борчларын сый бла толтуруб, сау-эсен къайтырларын тилейме.

Къайтарыб айтама, мен къралыбызны политикасын бек тюзге санайма. Биз  барыбыз да биригиб аны джакъларгъа борчлубуз.

Къочхарланы Джашарбек,

«Мара» ассоциацияны  советини башчысы,

Къарачай районда «Къарачай - алан халкъ» джамагъат

бирлешликни советини члени, «Карачаевский»

водоканалны тамадасы.