- Бусагъатда Украина бла байламлы бола тургъан ишле барыбызны да сагъайтхандыла. Сауутха-сабагъа джетмей, рахат халда оноу этилиб къалса барыбызгъа да иги эди. Амма, Украинаны бюгюннгю башчылыгъы, нек эсе да аны ангыларгъа унамай, сау 8 джылны узунуна терс ишлерин бардыра бергенди. Ол эки республиканы миллети къаллай бир джарсыды. Алайды да, тюз оноу этгенди Президентибиз Владимир Путин. Мен биле эдим ол быллай атлам этеригин, асыры кёб тёздю деб сакълаб тура эдим.

Кёб адам ангыламагъанлыкъдан, «бу къралны Украинада не хакъы барды, хар ким кесинде оноу этсин» деб сёлеше бередиле. Алай тюлдю. Бизни къралны къоркъуусузлугъуна къатылгъан хал къуралыб турады. Тамбласында кесине джаулукъ этерик кючле келиб, тюз босагъа тюбюнде къош салырларын джангыз бир кърал унарыкъ тюлдю. Мен ол затланы барын да айтыб, Президентибиз Владимир Путиннге письмо джазаргъа деб тура эдим. Джазгъан да этерикме къартланы, элни, районну атларындан. Аны ичинде къарачай миллет, Эресейни къурамына киргенли, антын бир кере да бузмагъанын чертиб айтырыкъма.

Къралны буйругъу бла анда спецоперациягъа болушлукъгъа деб баргъан джашларыбыз борчларын бет джарыкълы тындырыб, юйлерине къайтсынла, деб алагъа да тилек этебиз. Ин Ша Аллах, спецоперация, муратына джетиб, кёб бармай тохтар, ангыламагъанла да ангылаб, рахатлыкъ орналыр. Бизни, уллу тёлюню, борчубуз а джаш къауумгъа болумну тюзюнлей ангылатыуду, провакациялагъа алдатмазча ала кеслерин.

Джуккаланы Бийберт,

Ючкекен эл, джамагъат къуллукъчу.