Донбасс эмда Луганске халкъ республикалада бу арт джыллада бола тургъан терсликлени барыбыз да иги билебиз. Быйыл байрым (февраль) айны 24-де украин миллетчилени халкъгъа салгъан зарауатлыкъларын кёлтюрюб болмай, Эресей Федерацияны Президенти Владимир Путин Кърал Думабызны депутатларыны кёлтюргючлюклери бла эки республиканы да энчи къралла болгъанларын мюкюл этди. Ансына да, ол республикаланы халкъларына болгъан артыкълыкълагъа кёб чыдаб тургъан эди. Ма алай бла спецоперация башланды. Бизни аскерлерибиз Украинаны миллети бла кюрешмейди, миллетчиле бла кюрешеди. Эресейчи аскерле Украинагъа кирмеселе, НАТО-ну аскерлери кирлик эдиле. Ала кирселе уа, джууукъ джерден ракеталарын бизге бурлукъ эдиле.

         Мени сартын, мен украинлилеге да, оруслулагъа да бир миллетге къарагъанча къарайма. Эки къарнаш халкъны арасында къаугъа болгъанына бек къыйналама. Алай а, эртде-кеч болса да, алай болмай башха башха тюрлю болургъа, мадар джокъ эди.            Къралыбызда бир-бир артистлени, алимлени, спортсменлени, политиклени,..  миллетчиле джанлы болуб сёлешгенлерине уа бек сейирсинеме. Быллай къыйын кюнледе хар бир адам да къралыбызгъа къолундан келгенча болушургъа керекди. Донбасс эмда Луганске халкъ республикаладан къачхынчыла болуб тюз адамла келген болсала, биз да къолубуздан келгенча алагъа болушургъа керекбиз. 

         Спецоперация бла Украинагъа баргъан джашларыбыз а Аллах бла сакълансынла.

         Къысха заманда Эресейни да, Украинаны да джерлерине рахатлыкъ келтир деб, Уллу Аллахдан тилейме.       

  ТЮРКЛЮЛАНЫ Борис, 

                                      КъЧР-ни  халкъ артисти, Джёгетей Аягъы районну    

администрациясыны маданият бёлюмюню башчысы.