Мындан алда Къарачай-Черкес Республиканы Башчысы Темрезланы Рашид «Дамате» деген компания къауумну тамадалары бла - Наум Бабаев эмда Рашид Хайров - тюбешгенди. «Дамате» компания къауум Черкесскеде «Кавказ-мясо» эт комбинатны тамалында къой этден тюрлю-тюрлю затла этиб башлагъанды.

Бу иш компанияны 2018-чи джыл къой этни чыгъарыб башлау проектине тири джюрюш бергенди.
Тюбешиуде инвесторла чертгенден эки джылны ичинде проектге 2,68 миллиард сом ачха джояр умут барды.  Проектде белгиленнгенден, Ставрополь край бла Къарачай-Черкесияда агъачлы малланы багъарча джерле ишленникдиле эмда аллай джерлени реконструкциялары этилликди. Баш джумушланы бири «Дамате» деген сервис компания къурауду. Аны баш мураты къойланы тукъумларын иги этиб, къой этни чыгъарыугъа тири джюрюш бериудю, ишчилени юретиудю, эт комбинатланы агъачлы къой эт бла баджарыуду. Сервис компанияны игилиги недеди десегиз, энчи лабораториясы, ветеринар базасы, джангы технологияла бла хайырланыргъа мадар берилгениди.
«Дамате» этден башха зат этген заводну кючюн джылны ичине 720 минг къойгъа джетдирирге излейди. Ол проект джашауда орун алса, 500 адам иш къоллу боллукъду.
Бу санагъатны эмда бютеу малчылыкъны ёсюмю Къарачай-Черкесияны экономикасына хайыр келтирликди, деб чертгенди тюбешиуде республиканы Башчысы.
«Проект регионну экономика, агропромышленность комплексде ёсюмлери бла къалмай, къойчулукъ санагъатда да магъанасы уллуду. Бу ишге ёмюрлери элледе джашаб, мал бла кюрешиб келген элчиле да къошуллукъдула. Эл мюлк товар чыгъарыучуланы продукциялары сатылса,  аланы юйдегилерине хайыр келтирирча, джангы иш орунла ачылырча мадарла къураллыкъдыла», - дегенди Темрезланы Рашид.
«Дамате» компания эресейчи эл мюлк холдингди. Ол кърым таукъла чыгъарыу эмда аланы хайырландырыу бла, сют малчылыкъ бла, къой эт чыгъарыу бла кюрешеди. Ишин Пенза, Тюмень областлада, Ставрополь крайда бардырады.
Бу компанияны предприятиелеринде 6 мингден артыкъ адам ишлейди.