Арттотур (апрель) айны 16-да видеоконференция халда КъЧР-ни Башчысы Темрезланы Рашид «Россия – Исламский мир: KazanForum» деген халкъла арасы XV-чи экономика форумну бардырыуну хакъындан къурау комитетни кенгешине къошулгъанды. Форум хычаман (май) айны 14-ден 19-на дери Къазан шахарда ётерикди.
Къурау комитетни кенгешин РФ-ны Правительствосуну Председателини орунбасары Марат Хуснуллин бардыргъанды. Ол чертгенден, форумну баш мураты Эресей бла шох муслиман къралланы араларында байламлылыкъны ёсдюрюудю.
Татарстан Республиканы Башчысы Рустам Минниханов айтханнга кёре, бюгюнлюкде форумгъа къошулургъа излегенлерин 54 кърал билдиргенди. Бютеулей да Къазан шахаргъа 16 мингден аслам адам джыйыллыкъды.
Форумну тамалында инвестицияла, ислам финансла, маданият, спорт, илму, туризм, халкъла арасы политика, аны кибик башха ишлеге аталыб, 125 сессия ётерикди.
«Къарачай-Черкесия «Россия – Исламский мир» деген форумгъа таймаздан къошулгъанлай турады. Форум эресейчи эмда тыш къраллы инвесторлагъа регионларыбызны ёсюм алыр хыйсабларын кёргюзюрге мадар берликди. Сынам кёргюзгеннге кёре, сатыу-алыу, экономика, илму-техника, социал, маданият джаны бла Эресейни муслиман къралла бла байламлылыгъын ёсдюрюуде бу форумну магъанасы уллуду», - дегенди КъЧР-ни Башчысы Темрезланы Рашид.
