Халкъгъа халал къуллукъ этиб, аны ишине, джумушуна къараб, кече, кюн айырмай урунуб айланнган адамла кёбдюле. Ала республиканы тюрлю-тюрлю санагъатларында уруна, башхалагъа терен къайгъырыуну баш ишлерини бири этиб джашайдыла.
Мен хапарын айтыргъа излеген Къайытланы Азрет-Алий хаджини джашы Къаплан аллай адамланы бириди. Аны атасы да белгили адамланы бири эди. Ол «Октябрьский», «Мичуринский» совхозлада бухгалтер болуб ишлегенди, кесин фахмулу, билимли, тири адамча танытыб, кёбледен бюсюреу табханлай джашагъанды. Анасы Къушджетерланы Магометни къызы Тамара Мичуринскийде сабий садда ишлеб тургъанды. Гитчечикле билимли, тюзюуюн адамла болуб ёсерлерине аны энчи къыйыны киргенди.
Къаплан 1990-чы джыл байрым (февраль) айны 18-де туугъанды. Ол гитче болуб юйдегилери Къарданикге кёчеди. Ол анда орта билим берген школну 9 классын бошагъандан сора, Черкесск шахарда колледжде окъугъанды. Заманы джетиб, аны 2008-чи джыл аскерге чакъырадыла. Терк Башы Тегейде аскер къуллугъун сый бла толтургъанды. Анда аскер ишлени юсю бла ийген джерлерине, Чеченнге, Ингушха, барыб, анда 3 ай туруб, анга салыннган аскер борчну тыйыншлысыча толтуруб, махтау къагъытла алгъанды. «Участник боевых действий» деген удостоверениеси да барды.
Юйюне къайтхандан сора, билимин ёсдюре, Москвадагъы ачыкъ социал академияны Къарачай-Черкесияда филиалына кириб, аны джетишимли бошаб, юрист усталыкъ алыб чыкъгъанды. Къаплан урунуу джолун Джёгетей Аягъында башлагъанды. Былайда Бирикген сакълауул-диспетчер къуллукъда эки джыл ишлегенден сора, аны алайдан Зеленчук районнга кёчюредиле.
Къайыт улу 2014-чю джылдан Зеленчук районну Бирикген сакълауул-диспетчер къуллугъуну ишин бардырады. Аны иши къыйынды, джууаблыды. Ол адамны джашауунда орун алгъан къоркъуулу болумну къората, терк оноу эте биледи. Не къыйын болумда да эс ташламай, дженгил болушлукъ табдырыр мадарла къурайды. Адамланы саулукъларына, джашауларына да джууаблы болгъанын бек сезеди. Ишинде не гитче затчыкъгъа да терен эс бёледи. Къоркъуусузлукъ джанындан башха органла бла байламлылыкъ тутуб ишлейди. Кесини джууаблы ишин терк толтура, заманны излемине джууаб берген джангы технологияланы, программаланы хайырландырады. Сёз ючюн, адамладан джамагъат джорукъ бузулгъаны бла байламлы заявлениеле алады. Аланы журналгъа джазады, тюз-терс болгъанын тинтеди. Авариягъа тюшгеннге, башха зат бла джарсыгъаннга, адамла джашагъан джерде суу, ток болмай къалгъан кёзюуде зарауатлыкъ, къыйынлыкъ джетгенлеге, от тюшгеннге, ауругъаннга болушлукъ табдырыргъа хазырды. Аны тышында районда адам тас болса, суу басса, не тукъум къыйын болумда да халкъ джарсыуун бу къуллукъгъа билдиреди. Ол кеси эталмагъанын башха органлагъа айтады. Медицина къуллукъчула бла, от джукълатыучула бла, къутхарыучула бла, башха къуллукъла бла биригиб ишлейди. Анга районну администрациясы да уллу болушлукъ табдырады.
Кърал аны тутхан ишинде кёргюзген джигерлигине, тирилигине, къураучулукъ фахмусуна багъа бере, кёб тюрлю саугъа бла саугъалагъанды. Аланы арасында Эресейни МЧС-ни Баш управлениесини Къарачай-Черкесияда бёлюмюню, районну администрациясыны грамоталары да бардыла.
Къаплан Аджиланы Мунзирни къызы Аделина бла бирге 4 сабий ёсдюреди. Аделина почта бёлюмню тамадасыды, ол миллетини джангыз басма органы «Къарачай» газетни джаздырыугъа да терен эс бёледи.
Амин 3-чю, Алия 1-чи классха барадыла. Ала устазланы айтханларын этиб, иги окъургъа, ариу халили болургъа тырмашадыла. Солтан бла Казбек сабий садха джюрюйдюле. Окъургъа, санаргъа, джазаргъа сюйюб юренедиле.
Къаплан джамагъатны джумушларын этиуде адамлыкъны, ишленмекликни, тириликни юлгюсюн кёргюзе, адамланы арасында шохлукъну, къарнашлыкъны къурч кёпюрлерин бегите, къайгъырыу кючюн тёгерекге джая джашайды.
УЗЕИРЛАНЫ Хусей.
