«Культурный забег» фестивалны тамалында Къарачай-Черкесияда Муху ёзенде скайраннингден эришиуле эмда суратчыланы пленэрлери ётгенди. Ол ишни Шимал Кавказ кърал академия къурагъанды.
«Эришиулеге Эресейни джер-джеринден келген спортчула къошулгъан эдиле. Ала 25, 10 эмда 5 километр дистанцияланы ётгендиле. Къонакъланы арасында альпинизмден СССР-ни белгили усталары бар эдиле, ала хорлагъанланы саугъалаугъа къошулгъан эдиле», - деб хапар айтханды ШККъА-ны пресс-къуллугъуну тамадасы Катчиланы Елена.
Эришиуледен сора да фестивалда живописден мастер-класс къуралгъанды. Анга спортчула, суратчыла, къонакъла да къошулгъан эдиле. Мастер-классны Эресейни Суратчыларыны союзуну члени, Шимал Кавказ кърал академияны физвоспитание кафедрасыны устазы, альпинизм бла тау туризм секцияны тренери Чотчаланы Елена бардыргъанды.
«Мени, ШККъА-ны физвоспитание кафедрасыны бютеу командасыны да быллай иш къураргъа эртдеден да муратыбыз бар эди. Биз ай чакълы бирни хазырланнганбыз. Анга административ джумушладан сора да, джолланы хазырлау иш киргенди. Эришиулеге къошулгъанланы къоркъуусузлукъларын баджарыугъа уллу эс бёлгенбиз. Эм сейири уа неди десегиз, фестивалгъа къошулгъанлагъа бир-бири бла байламлы болмагъан затла – спорт бла живопись – таулада бир-бирлерине келишгенлерин кёргюзгенбиз», - дегенди Чотчаланы Елена.
Алайды да, «Малая марка» дистанцияда биринчи орунну Краснодар крайдан Ева Ковалева бла Ставрополь крайдан Владислав Вихляев алгъандыла. «Вертикальный километр» дистанцияда эркишилени арасында биринчи оруннга Къарачай-Черкесиядан Эзиланы Азамат тыйыншлы болгъанды. Къарачай-Черкесиядан спортчула Тимур Джердисов бла Ксения Мулицына да «Муха» дистанцияда биринчиле болгъандыла.
Фестивалны къураугъа Орус география обществону КъЧР-де бёлюмюню джаш тёлю клубу да къошулгъанды. «Акъсауут» тау клубну эмда «Архыз» тау-спорт клубну келечилери да фестивалны бардырыргъа палатка лагерь къураб болушхандыла.
Фестивалгъа къошулгъанлагъа саугъала, джыйылыуну бардыргъан эмда къурагъан Чотчаланы Елена салгъан суратла берилгендиле.
САЛПАГЪАРЛАНЫ Умар.
