Бу кюнледе Федерал налог къуллукъну тамадасыны орунбасары Дмитрий Сатин Къарачай-Черкесияны Башчысы Темрезланы Рашидни Федерал налог къуллукъну КъЧР-де управлениесини джангы тамадасы бла танышдыргъанды.

РФ-ны финансла министри Антон Силуановну буйругъу бла ол къуллукъгъа РФ-ны кърал граждан къуллугъуну 1-чи класслы кенгешчиси Текеланы Таубийни джашы Расул салыннганды.
«Дмитрий Сатин Текеланы Расулну ишине уллу багъа бергенди. Теке улу Къарачай-Черкесияны налог органларында 2000-чи джылдан бери ишлейди. Джангы тамада налогла бла байламлы борчланы толтурлугъуна, Федерал налог къуллукъда бюгюнлюкде сингдирилиб баргъан джангы мадарланы тыйыншлысыча хайырландырлыгъына ышаннганын да айтханды Дмитрий Сатин», - деб джазгъанды Темрезланы Рашид.
Темрез улу чертгенден, налог органла къралны, республиканы да финанс системасыны магъаналы кесегидиле. Федерал налог къуллукъ бла, ФНС-ни Шимал Кавказда регионла арасы инспекциясы бла, ФНС-ни КъЧР-де бёлюмю бла республикан властланы араларында байламлылыкъ джюрюйдю.
«Текеланы Расулну тамада къуллукъгъа салыннганы бла алгъышлайма. КъЧР-ге болушлукъ этгени, кърал власть органла бла байламлылыкъ джюрютгени ючюн Федерал налог къуллукъну башчылыгъына да разылыгъымы билдиреме», - деб къошханды Темрезланы Рашид.