Хычаман (май) айны 3-де къарачай миллет Джуртуна къайтханына аталыб, Къарачай-Черкесияда къууанч джыйылыула бардырылгъандыла.
Къарачай шахарда
Халкъыбыз туугъан Джуртуна къайтхан кюн КъЧР-ни Башчысы Темрезланы Рашид Къарачай шахарда кёчгюнчюлюкде джарсыгъан къарачайлылагъа аталгъан эсгертмеге гокка хансла салгъанды.
Гокка хансла салыугъа РФ-ны Федерал Джыйылыууну Федерация Советини КъЧР-ден сенаторлары Салпагъарланы Ахмат бла Крым Казаноков, РФ-ны Кърал Думасыны депутаты Ёзденланы Солтан, КъЧР-ни Правительствосуну Председатели Мурат Аргунов, КъЧР-ни Халкъ Джыйылыууну (Парламентини) Председатели Александр Иванов, КъЧР-ни Башчысыны эмда Правительствосуну Администрациясыны тамадасы Мурат Озов, депутатла, Правительствону къуллукъчулары, Къарачай шахар округну мэри Орусланы Марат, Къарачай районну администрациясыны башчысы Къушджетерланы Спартак, джамагъат бирлешликлени келечилери, дин къуллукъчула, тюрлю-тюрлю учреждениелени ишчилери, шахарчыла дагъыда башхала къошулгъан эдиле.
Эм алгъа КъЧР-ни муфтийини орунбасары, имам Абу Ханифаны атын джюрютген Къарачай-Черкес ислам институтну ректору Батчаланы Мухаммат хаджи, туугъан джуртларына къайталмай къалгъан ахлуларыбызны эсгере, дууа этдиргенди. Ызы бла алайгъа джыйылгъанла эсгертмеге гокка хансла салгъандыла.
Ол ишни юсюнден КъЧР-ни Башчысы Темрезланы Рашид: «Къарачай халкъны джангырыу кюню Къарачай-Черкесияны бютеу миллетлерин да бирикдирген байрамды. Туугъан джуртубузну джылыуун, ашхылыгъын да биз – тюрлю-тюрлю миллетлени эмда динлени келечилери – бирге сакъларгъа керекбиз. Къарачай-Черкесияны миллетлерини эмда къралыбызны тамблагъы кюню, сёзсюз да, бирикмеклик, келишиулюк дегенча ашхы шартла бла байламлыды. Аны ёсюб келген джаш тёлю билирге тыйыншлыды. Мындан ары быллай къыйынлыкъны бир миллет да сынамасын», - дегенди.
РЕСПУБЛИКАН АРАЛЫКЪДА
Къарачай-Черкесияны ара шахарыны «Джашил айрымкан» деген солуу эмда джарыкълыкъ паркыны амфитеатрында къарачай халкъны Джуртуна къайтханыны 67-джыллыгъына аталыб къууанч джыйылыу болду.
Джыйылыугъа КъЧР-ни Башчысы Темрезланы Рашид, КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, РФ-ны Федерал Джыйылыууну Федерация Советини КъЧР-ден сенаторлары Салпагъарланы Ахмат бла Крым Казаноков, РФ-ны Кърал Думасыны депутаты Ёзденланы Солтан, КъЧР-ни Башчысыны эмда Правительствосуну Администрациясыны тамадасы Мурат Озов, федерал структураланы джергили бёлюмлерини тамадалары, Правительствону къуллукъчулары, джамагъат бирлешликлени келечилери, республиканы шахарлары бла районларындан келген къонакъла, кёчгюнчюлюкню сынагъан къартла дагъыда башхала бар эдиле.
Алгъы бурун КъЧР-ни муфтийини орунбасары, имам Абу Ханифаны атын джюрютген Къарачай-Черкес ислам институтну ректору Батчаланы Мухаммат хаджи, кёчгюнчюлюкню джылларында ёлген джердешлерибизни эсгере, джыйылгъан джамагъатха дууа этдирди. Шимал Къарачай-Черкес округну Благочинныйи, Покров клисаны бабасы Александр Нартов да ёлгенлени эсгертди, саулагъа да тынчлыкъ-эсенлик теджеди.
Ызы бла сёз КъЧР-ни Башчысы Темрезланы Рашидге берилди. Ол джыйылгъанланы байрам бла алгъышлады.
- Бу кюн ётгюрлюкню, тёзюмлюлюкню, тюзлюкню белгисиди. Сёзсюз да, ол шартла миллетибизге, тюрлю-тюрлю къыйынлыкъладан да ётюб, тыш джуртда сау къалыргъа болушхандыла. Алай бла къарачайлыла сыйларын, намысларын, маданиятларын, адетлерин сакълагъандыла. Кёчгюнчюлюкню джылларында джанларын-къанларын аямай ишлеб, сабийлерин ачлыкъдан сакълагъан тиширыулагъа разылыгъыбызны билдиребиз. Аталарыбыз, къарт аталарыбыз да къазауатда къралыбызны эркинлигин джакълаб кюрешгендиле. Аланы араларында «Совет Союзну Джигити», «Эресей Федерацияны Джигити», «Социалист Урунууну Джигити» деген атлагъа тыйыншлы болгъанла да бардыла.
Бюгюнлюкде да республиканы ёсюмюне уллу юлюшлерин къошхан, миллетни атын махтау бла айтдыргъан джердешлерибиз кёбдюле. Биз ала бла бла ёхтемленебиз. Республикабызны миллетлерини бары да КъЧР-ге ёсюм алдырыб кюрешедиле, шохлукъда, бирикмекликде джашайдыла. Джердешлерибиз аскер къаугъагъа да къошулуб, Эресейни эркинлигин джакълайдыла. Салыннган борчла тыйыншлысыча толтурулуб, аскерчилерибиз хорлам бла къайтырларына ышанабыз.
Къарачай-Черкесияда джашагъанланы байрам бла алгъышлай, саулукъ-эсенлик, мамырлыкъ, джетишимле теджейме, - деди Темрезланы Рашид.
Джыйылыуда урунууну ветераны, Дружба элде джашагъан Хубийланы Азрет-Алий да сёлешди. Ол къарачайылыланы къалай кёчюргенлерини, ала ызларына къалай къайтханларыны юсюнден хапар айтды. Кёчгюнчюлюкню тарихи унутулмазгъа кереклисин да черти.
Къууанч джыйылыуну кёзюуюнде республикабызны белгили джырчылары бла тепсеу къауумлары – КъЧР-ни махтаулу артисти Алботланы Марьяна, «Эльбрус» кърал тепсеу ансамбль, «Балкария» тепсеу ансамбль, КъЧР-ни махтаулу артисти Катчиланы Руслан, КъЧР-ни махтаулу артисти Багъатырланы Алика, КъЧР-ни халкъ артисти Ачар Меремкулов, «Къарча» сабий ансамбль, «Апсаты» фольклор ансамбль эмда Эдиланы Руслан, КъЧР-ни халкъ артисти Батчаланы Лидия - уллу концерт кёргюзюб, адамланы къууанч сезимлеге бёледиле. Къууанчха Къабарты-Малкъардан белгили джырлаучу Жаникаланы Эльдар эмда Ингушетияны махтаулу артисти Лема Нальгиева да къошулгъан эдиле, алагъа да джыйылгъан джамагъат джарыкъ тюбеди.
Амфитеатрны къатында эски суратладан, СССР-ни эмда Эресейни Джигитлерине, Социалист Урунууну Джигитлерине, къарачайлыланы туугъан джуртларына къайтарыр ючюн Москвагъа баргъан делегацияланы келечилерине аталыб, кёрмюч къуралгъан эди да, байрамгъа къошулгъанла анга да сюйюб къарай эдиле.
САЛПАГЪАРЛАНЫ Умар.
