Чакъырыу
Сыйлы къарачай миллетим! Хурметли газет окъуучуларыбыз!
Бюгюнлюкде барыбызгъа да тынч заманла болмагъанын ким да ангылайды. Къралыбыз кесини тынчлыгъын сакълаб кюрешген заманда тыш джауларыбыз, бычакъ, шкок, сюнгю алмагъанлай, аууз бла, сёз бла, ётюрюк хапарла бла миллетлени ичлеринден чачаргъа кюрешедиле. Ай медет, ичибизден кёбле да ол ариу, тюлкю хыйлалыкъ бла таб джарашдырылгъан «кертиге» тынгылаб, къулакъ ийиб, иги этебиз деб ангылагъанлары бла къайгъы салыб кюрешедиле.
Къыйын заманлада кёбчюлюк информацияны мадарларына хаман да артыкъ уллу ауурлукъ джетеди. Ич, тыш джауларбыз да ариу ангылайдыла джамагъатны ангысын терсине бурур ючюн аны газетин, журналын, телевидениесин къурутургъа керек болгъанын. Миллетни миллетлигин къурутур ючюн да керекди СМИ бла кюреш. Эшта, джамагъатда сыйы болмагъан СМИ бла кюрешге киши да заманын кетерлик болмаз эди, алай эсе уа ишибиз зыраф тюлдю.
Аны барын да ангылай, биз, «Къарачай» газетни къуллукъчулары, керексиз къайгъылагъа, провокациялагъа бой бермезге кюреше, ишибизни бардырабыз. Бизни баш борчубуз не къыйын болумда да газетни юсю бла миллетибизни хапарлы этерге, тилибизни, тинибизни, тарихибизни, адабиятыбызны, маданиятыбызны, санатыбызны сакъларгъады. Ёмюрледен бери да Къарачайны ашхы шартларыны бири – бирикмекликди, бир-бирине дагъан бола билиудю, «адам къатында адам ёлмейди» деген нарт сёзге керти болуб, кимге да болушургъа хазырлыгъыды.
2024-чю джыл «Къарачай» газетибиз кесини 100-джыллыкъ юбилейин белгилерикди, Аллах айтса. Бир ёмюр бек кёб заманды къайсы бир газетге да. Къарачайны кесини биринчи басма изданиеси андан эртдерек чыкъгъанды, алимлерибиз ачыкълагъаннга кёре, араб харифле бла джазылгъан газет 1919-чу джыл басмадан чыгъыб тургъанды. Алай болса да, Совет власть орун алгъандан сора газетни чыгъыб башлагъанындан санайбыз да, ол 1924-чю джылны аууз-герги (октябрь) айыны 19-ду.
Келир джыл газетибизни тарихинден да, аны бетлеринде тюрлю-тюрлю джыллада, кърал болумлада къаллай материалла басмаланнганларыны юсюнден да хапар берирбиз деб, ышанабыз.
Аны бла да къалмай, 100-джыллыкъ къартчыкъбыз демей, джашдан джаш бола, окъуучуларыбыз джаратыр материалланы не къадар да басмаларгъа кюреширикбиз. Биз кърал изданиебиз, къралны джашауундан да бир джанына турмагъанлай, миллетибизни джашауун да суратларгъа керекбиз да, ол борчубузну къолубуздан келгенича, толтура барлыкъбыз.
Сыйлы къарачай миллетим! «Къарачай» газетни коллективини, кесими атымдан да сизден тилегим: аланла, газетибизге тири джазылыгъыз деб, олду. Ай медет, почтаны да къарыусуз ишлегенин билебиз, алай болса да, ол да тюзелир, аны кючю бла, джамагъатны тирилиги бла арада байламлылыкъ юзюлмез деб, ышанабыз. «Гитче бармакъ да асыуду» дейдиле да, хар биригиз да уллу болушлукъ этериксиз.
Унутуб барама. Келир джыл газетни 100-джыллыгъы бла байламлы эсге тюшюрюуюгюз, сейир хапарыгъыз бар эсе, анга атаб, назму, джыр, хапар (таб, роман да!) джазгъан эсегиз, башха айтырыгъыгъызны да бизге билдирирге боллукъсуз: газетде белгиленнген электрон адрес бла, почта бла, кесигиз келиб да. Бизни байрамыбыз сизни тирилигигизден, сизни кёлтюргючлюгюгюзденди да, мындан ары арабызда ол байламлылыкъ юзюлмез деб, хакъ кёлюм бла ышанама.
Айырыб бир затха эс бёлюрге излейме. Бу джол джаш адамлагъа, ёсюб келген сабийлегеди айтырым. Биз артыкъ да бек сизни ючюн кюрешебиз, сиз тилибизни унутмасагъыз, окъуй турсагъыз деб. Джазыгъыз, балала, кёлюгюзге келгенни айтыргъа уялмагъыз. ВКонтакте социал сетде сиз аслам олтурасыз да, аны кючю бла да байламлы болургъа боллукъсуз. Таша айтырыгъызны уа кишиге дыф деб билдирмезге сёз береме!
ХУБИЙЛАНЫ Фатима,
баш редакторну борчларын толтургъан,
Эресей Федерацияны Журналистлерини союзуну члени.
