Къарачай-Черкесияны армрестлингден спортчулары аууз-герги (октябрь) айны 26-дан абыстол (ноябрь) айны 6-на дери Индияны Нью-Дели шахарында чемпионатха эмда дунияны биринчилиги ючюн бардырылгъан эришиулеге къошулгъандыла.
Эришиуледе 63 къралдан 1000-ден артыкъ спортчу къарыуларын сынагъандыла. Къаты кюрешде Къарачай-Черкесиядан баргъан къол тутуш бла кюрешген джашларыбыз бла къызларыбыз тюрлю-тюрлю дараджалы 11 медаль алыб къайтхандыла.
Эркишиле бла тиширыуланы араларында 100 кг ауурлукъда онг къолу бла эришиуде Мамхегов Марат 3-чю, Волкова Марта 90 кг ауурлукъда сол къолу бла 2-чи, онг къолу бла 1-чи орунланы алгъандыла. Тиширыуланы юниор къауумунда (19-23 джылгъыла) Волкова Марта эки къолу бла да тутушуб, алтын медаллагъа ие болгъанды. Эркишилени юниор къауумунда (16-18 джылгъыла) Токъланы Мухаммат (80 кг) сол къолу бла 1-чи болгъанды, Байкъулланы Абдуллах (60 кг) сол къолу бла 1-чи, онг къолу бла 2-чи орунланы алгъанды, Лайпанланы Алан (55 кг) сол къолу бла тутушуб, алтын медалны алгъанды. 14-15 джыл болгъан джашчыкъланы арасында Лепшокъланы Рамазан эки къолу бла да кюмюш медаллагъа ие болгъанды.
Бютюн да бек ёхтемлендирген, эришиулени эсеблерине кёре, Эресей Федерацияны командасы бютеу командаланы ичинде биринчи болгъан бла къалмай, ол биринчиликни саугъасын – Кубокну – Къарачай-Черкес республикагъа бергенлериди, бизни къол бла тутушуучуларыбызны уллу джетишимлери ючюн. Ол бек уллу багъады бизни республиканы армрестлингден школуну махтаугъа тыйыншлы ишине.
Алайды да, ол школну тренерлерине – Ёзденланы Умаргъа, Токъланы Шамилге, Тамбийланы Рамазаннга, Эриккенланы Барадиннге, Орусланы Расулгъа, Борлакъланы Муратха, Гочияланы Адамгъа – бек мардасыз бюсюреу этерге тыйышлыды. Аланы ишлери, тёзюмлюлюклери эмда сохталарына ышанмакълыкълары саулай дуниягъа айтылгъан сыйны келтиреди.
Тебуланы Салимат.



