Алийланы Умарны атын джюрютген Къарачай-Черкес кърал университетни Маданият бла санатла институнда «Ариулукъ къатыбыздады» («Прекрасное рядом») деген аты бла кёрмюч ачылды.
Институтну 1-чи эмда 2-чи къабатларында орналгъан кёрмюч келгенлени суратлау санатны тюрлю-тюрлю жанрларында джарашдырылгъан чыгъармала бла танышдыргъанды. Авторла кеслерини чыгъармалары бла кюн сайын кёрюб тургъан затларынга джангы кёз бла къараргъа, тёгерекде ариулукъну хар неде да эслеб, джангыдан сезерге себеб береди.
Кёрмючге кеслерини ишлерин Эресейни Суратчыларыны союзуну къурамында болгъан Аджиланы Валентина, педагогика илмуланы кандидаты, суратлау санатны кафедрасыны доценти Батчаланы Зумат, тамада устаз Биджиланы Асхат бла 22-чи группаны студенти Джатдоланы Амир салгъан эдиле.
Кёрмючге къошулгъанлагъа эмда къонакълагъа КъЧКъУ-ну окъуу джанындан проректоруну борчларын толтургъан Чанкаланы Мурат хошкелди сёзюн айтыб, кёрмючню къурагъанланы, сурат салгъанланы да ишни башланнганы бла алгъышлады. Устазла бла студентлени чыгъармачылыкъ башламчылыкъларына эмда сурат салыу усталыкъларына ёсюм берирге быллай ишлени магъанасын чертди.
Маданият бла санатланы институтуну директоруну борчларын толтургъан Наталья Кириченко да суратлау чыгъармачылыкъ окъууну барыуунда да уллу хайыр келтиргенин, быллай проектлени миллетни маданият байлыгъын сакълауда эмда ёсюмюнде уллу файдасы болгъанын айтды.
Суратлау санатны кафедрасыны профессору, Эресейни Суратчыларыны союзуну къурамында болгъан Тамбийланы Бурхан, алгъышлагъанлагъа къошулуб, къонакълагъа хошкелди айтды, авторлагъа чыгъармачылыкъ ишлеринде джетишимле теджеди.
Сурат чыгъармачылыкъ санатда сынамны кючюн, тёлюден тёлюге бериле келген санат байлыкъны магъанасыны юсюнден декоратив-практика санат бла дизайнны кафедрасыны доценти, педагогика илмуланы кандидаты, КъЧР-ни маданиятыны махтаулу къуллукъчусу, Эресей Федерацияны баш профессионал окъуууну сыйлы къуллукъчусу Виталий Огузов да айтды.
Джыйылгъанланы алларында КъЧР-ни маданиятыны махтаулу къуллукъчусу, Эресейни Суратчыларыны союзуну къурамында болгъан Чомаланы Лариса, КъЧР-ни махтаулу суратчысы Маршанкъулланы Руслан да сёлешдиле.
Бу ишге керти къууанч джылыу берген КъЧКъУ-ну музыкадан билим берген кафедрасыны къуллукъчулары бла студентлерини джырлагъанлары, тепсегенлери болду.
– «Ариулукъ къатыбыздады» деген кёрмюч къараучулагъа бир айны ичинде ачыкълай турлукъду. Алай бла, университетни суратчыларыны чыгъармалары бла танышыргъа боллукъду. Ариулукъ кертиси бла да къатыбызда болгъанына, аны кёре билирге кереклисине ол энтда бир кере шагъатлыкъ этерикди, – деди Наталья Кириченко.
Тебуланы Салимат.



