Къарачай-Черкесияда Ата джуртну аскерчилерини юйдегилерини комитетини (КСВО) регионал бёлюмю эмда СВО-ну ветеранларыны ассоциациясы «4 года КСВО – 400 добрых дел» деген бютеу Эресей акцияны тамалында «Правомобиль» деген аты бла тюбешиу ётдюрдюле.

Бу иш Джамагъатха кёлтюргючлюк этген штабда ётгенди. Аны баш нюзюрю СВО-гъа къошулгъанлагъа эмда аланы юйдегилерине хакъсыз юрист болушлукъ этиу эди.
«Бу ыйыкъны ичинде юйдегилени эркинликлерини юсюнден не къадар кёб соруугъа джууаб берирге эди бизни муратыбыз. Къыйыныракъ сорууланы да, джууабсыз къоймай, джик-джигине дери ачыкъларгъа излегенибиз», – деди КСВО-ну бизни регионда бёлюмюню тамадасы Аида Анушко.
«Правомобилни» ишине СВО-ну ветеранларыны ассоциациясыны КъЧР-де бёлюмюню тамадасы Мутчаланы Дахир, адамланы эркинликлерин джакълауну хакъындан – Зарема Умалатова, прокуратураны, Эресейни Социал фондуну, «Защита Отечества» фондну филиалыны, Кърал юрист бюрону эмда Сюдю приставланы келечилери къошулдула. Алайда 33 ишге къарагъандыла. Аланы кёбюсю СВО-да ёлгенлени эмда анда тас болуб къалгъан аскерчилени юйдегилерине пенсия чыгъарыуну, ЖКХ-гъа борчну тёлеуню неда борчну къалай кетерирге боллукъну юсюнден эди. Бютюн да бек, СВО-да къуллукъ эте тургъанланы юйдегилерине джораланнган ачхагъа къагъытла джарашдыргъан заманда къыйын болумгъа тюшгенлеге энчи эс бёлюндю.
Хар соруугъа тыйыншлы джууаб берилди. Алайда толу ачыкъланмай къалгъан сорууланы, джангыдан ведомствола бла сюзюб, джууаб бериллигин айтдыла.
«4 года КСВО – 400 добрых дел» акция Ата джуртну юйдегилерини комитетини 4-джыллыгъына аталгъанды. Ол аскерчилеге эмда аланы юйдегилерине энчи болушлукъ этер ючюн бардырылады.

Тебуланы Салимат.

 
{jcomments}