Мындан алда Черкесск шахарда «Лучший антинаркотический социальный проект» деген ат бла бардырылгъан шахар эришиуню эсеблери чыгъарылгъанды.
Анга шахарны школларыны сохталары къошулгъандыла. Ала устазлары бла бирге наркоманиягъа къаршчы кюрешге, адамланы саулукълу джашаугъа кёллендириуге аталгъан тюрлю-тюрлю видеороликле, презентацияла, сормушла дагъыда башха ишле хазырлагъандыла.
«Эришиуню баш мураты сабийле энчи чыгъармачылыкъ ишле этерча мадарла къурауду. Бюгюнлюкде сохтала видеола алыргъа, графика материалла этерге, тюрлю-тюрлю оюнлагъа къошулургъа, командада биригиб ишлерге дженгил юренедилеле. Ол фахмуларын ала иги джаны бла хайырландырыргъа керекдиле. Сабийле эришиуге сюйюб къошулгъандыла, биз да анга къууанабыз», – дегенди конкурс комиссияны тамадасы, Черкесск шахарны мэриясыны окъуу управлениесини тамадасыны орунбасары Рита Камова.
Комиссия проектле къалай джазылгъанларына, алада магъана къалай ачыкъланнганына, сабийлени фахмуларына багъа бергенди.
Эсеблеге кёре, эм иги проектге 19-чу номерли гимназияда окъугъан Эриккенланы Эмилияны «Твой выбор: миф или реальность» деген темагъа джазылгъан проекти саналгъанды. Экинчи орун 4-чю номерли школда окъугъан Джантемирланы Ясмина бла Фериде, Лайпанланы Заира этген «Цена одной иллюзии» деген видеороликге берилгенди. Ючюнчю орунну 5-чи номерли гимназияда окъугъан Мансура Дахунова этген видеоролик алгъанды. Хорлагъанлагъа саугъала берилгенди.
Комиссияны къурамына киргенле бары да, сабийлени этген ишлерине къууаныб, ала мындан ары да чыгъармачылыкъ иш бла кюрешгенлей турсала излегенлерин айтхандыла.
Узеирланы Хусей.




