Быйыл аууз-герги (октябрь) айны 15-ден 19-на дери къралны ара шахарында Тхэквондону Москва школуну кубогу ючюн тхэквондону ИТФ тюрлюсюнден бютеу Эресей дараджалы эришиуле бардырылгъандыла.
Ары Къарачай-Черкесиядан Магулаланы Элмуратны джашы Азамат къошулгъанды. Магула улуну ол мийик дараджалы эришиулеге Къарачай-Черкесияны Спорт министерствосу ышанмакълыкъ танытыб ашыргъанды. Азамат ышанмакълыкъгъа, кертиси бла да, тыйыншлы болгъанын танытханды. Ол биринчи оруннга ие болуб къайтханын аны тренери Чагъарланы Къурманалийни джашы Арсен айтханды.
– Тхэквондону ИТФ тюрлюсю Шимал Кореяда джаратылгъанды. Азамат баргъан эришиуледе къызла, джашла да «сермешгендиле», – деди Арсен. – Магула улу эркишилени араларында бардырылгъан эришиулеге къошулгъанды. Биринчи оруннга ие болуб, республикагъа сый-махтау келтиргенди. Ол болмаса бизни республикада спортну бу тюрлюсю бла аллай джетишимге джетген адам болмагъанды. Азамат III-чю данны эмда къара белибауну иесиди.
Азамат баргъан эришиуледе 2000 спортчу кесини кючюн-къарыуун сынагъанды. 28 джыл болгъан джердешибиз, алтын медалны да алыб, тау джуртуна къайтханды.
– Азамат кёб болмай Москвада къангаланы сындырыу бла байламлы бютеу Эресей дараджалы эришиулеге да къошулгъанды. Анда да атын айтдырыб къайтханды. Келир джылны аллында Москвада тхэквондону ИТФ тюрлюсюнден Эресейни чемпионаты боллукъду. Ары барыб, анда да биринчи орун алыр муратлыды, – дейди Арсен. – Ол заманда Эресейни джыйым командасына къошуллукъду. Алай бла, Европаны эмда дунияны чемпионатларына къошулургъа джол чыгъарыкъды. Мен ол затха толу ийнанама. Ол тхэквондону ИТФ тюрлюсюнден Эресейде эм кючлю спортчуланы бири болгъанын танытханды.
Магулаланы Азамат аллында программист усталыкъ алгъанды. Андан сора Къарачай-Черкес кърал университетде спорт бла физкультура факультетни тауусханды. Айтыргъа, аны эки баш билими барды. Бюгюнлюкде программист болуб ишлейди. Аны бла бирге спорт бла да кюрешеди эмда уллу джетишимлеге да джетгенлей келеди. Ол Къарачай-Черкесияда тхэквондону ИТФ тюрлюсюнден федерацияны президентиди.
Чагъарланы Арсен эм алгъа бухгалтер эмда юрист усталыкъ алгъанды. Андан сора Къарачай шахарда университетни физкультура бла спорт бёлюмюн тауусханды. 11 джыл заманындан бери спорт бла кюрешиб тебрегенди. Аллында ол дзюдо бла шагъырей болгъанды. Артдаракъда, имбашын аурутхандан сора, тхэквондону ИТФ тюрлюсюне кёчгенди.
– Бизни Корея Халкъ Республикадан келген устаз юрете эди, – деб эсине тюшюреди Арсен. – Мен, уллуракъ да, эслирек да болгъаным себебли, андан кёб затха юреннген эдим. Ол Москвагъа кетгенинде, сабийлени джыйыб, тхэквондону ИТФ тюрлюсюне юретиб башладым.
Ма алай бла, ол тренерни джолуна турады. Бюгюнлюкде Арсен республикан сабий-джаш тёлю спорт школда тхэквондону ИТФ тюрлюсюнден устаз-тренер болуб ишлейди. Аны сохталарыны спортда джетишимлери аман тюлдюле. Ала бютеу Эресей дараджалы эришиуледе 2-чи, 3-чю орунланы алгъанлай турадыла. Европада 3-чю орунну алгъан сохталары да бардыла. Шимал Кавказ федерал округда 1-чи оруннга ие болгъанлары да аз тюлдюле.
– Шимал Кореяда сабийлени барысы да тхэквондону ИТФ тюрлюсю бла кюрешедиле. Алада сабийлени барысы да спортну бу тюрлюсюнден хапарлы болургъа керекдиле, – дейди Арсен. – Ол адамны чыныкъдырады, кючлю да этеди. Сёз ючюн, Магулаланы Азамат ол затха толу шагъатлыкъды. Ол Эресейни эмда Европаны призёруду, Кореяда да болгъанды.
– Арсен, сабийлени ичлеринде спортну бу тюрлюсю бла кюрешгенле джетишимли болаллыкъдыла, деб айтырчамыды?
– Кёб болмай Сочиде бютеу Эресей дараджалы эришиуле болгъандыла. Анда 13 джыл болгъан Бостанланы Алибек 1-чи орунну, 9 джыл болгъан Данайланы Керим да 2-чи орунну алгъандыла. Ала спортну гитче джарыкъ джулдузчукъларыдыла. Бара баргъан заманда ала республиканы атын айтдырлыкъларына ийнанама.
Спорт адамгъа кючню, къарыуну, кесине ышанмакълыкъны эмда саулукъну саугъа этеди. Ол затны эсге алыб, къралда, Къарачай-Черкесияда да адамланы, бютюн да сабийлени, спортха алландырыугъа уллу магъана бериледи. Ол джолда баргъан адамла барысы да къалгъанлагъа ашхы юлгю болгъанларына ишек да джокъду.
Мамчуланы Дина.



