Мындан алда Курган шахарда, Михаил Малинниковну эсгериуге аталыб, сюдю приставланы къуллукъчуларыны арасында тутушну талай тюрлюсюню джорукъларын бирикдирген кюрешден (комплексное единоборство) эришиуле бардырылгъандыла.

Анда Сюдю приставланы федерал къуллугъуну Къарачай-Черкес Республикада управлениесини келечиси, ёчлю оруннга чыгъыб, кюмюш майдал алгъанды.
Бу эришиуле джыл сайын да, спортну бу тюрлюсюн кенгнге белгили этер эмда ведомствону къуллукъчуларыны усталыкъларыны, кючлерини дараджасын кёлтюрюр мурат бла, бардырыладыла. Спортну бу тюрлюсю ведомствону къуллукъчуларына ала салыннган борчну къралны законуну тамалында тыйыншлысыча толтурурча мадарла къурайды. Ол бу санагъатны спортчуларындан кюч, къарыу, тёзюм, джыгъышыуну лагъымларын иги билиуню излейди.
Къарачай-Черкесиядан эришиулеге Сюдю приставланы бизни республикада управлениесини сюдледе законнуджорукъну баджарыуну хакъындан бёлюмюню сюдю приставы, ич къуллукъну лейтенанты Биджиланы Шамиль къошулгъанды.
Ол 85 килограмм ауурлукъда кесини кючюн, болумун, усталыгъын кёргюзгенди. Тири адам, сайлау этапны ётюб, финалгъа чыгъыб, экинчи оруннга ие болгъанды. Биджиланы Шамиль ол джетишими бла халкъыбызгъа, республикабызгъа да сый махтау келтиргенди.

Алчакъланы Хусей.

 
{jcomments}