Социал фондну Къарачай-Черкес Республикада бёлюмюню аралыгъында тамада тёлю кесини заманын тири, хайырлы ашырады. Уруп, Хабез, Гитче Къарачай районлада аллай аралыкълагъа джюрюген джыллары келген адамла сагъышларын-къайгъыларын чачхан сейир ишлеге, окъуу программалагъа тири къошуладыла.
Ала, заманларын зауукълу ашыргъандан сора да, джангы танышла къурайдыла, джангы технологиялагъа юренедиле.
Уруп районну аралыгъында тамада тёлюню район больницаны терапевти Биджиланы Аминат бла тюбешгенлерин, аны саулукъ сакълауну юсюнден лекциясына сюйюб тынгылагъанларын айтхандыла. Аминат джылы келгенле саулукъларын къалай сакъларгъа боллукъларыны юсюнден сёлешгенди. Лекция бошалгъандан сора тынгылагъанла терапевтге тюз къалай ашаргъа керегини, аланы джылларында къалай къымылдаргъа боллугъуну, джылы келген адамлада къозгъалыргъа боллукъ ауруулагъа къаршчы къаллай профилактика ишле бардырыргъа кереклисини юсюнден соруула соргъандыла. Ол, хар бирине тынгылы джууабла бериб, аланы разы этгенди.
Хабез районну аралыгъында джылы келгенлени таукеллендирген, алагъа тирилик келтирген стол оюнладан турнир бардырылгъанды. Ала шахматлагъа, башха оюнлагъа тири къошулуб, кеслерини усталыкъларын, сагъыш эте билгенлерин кёргюзгендиле. Турнирни кёзюуюнде оюнладан тышында да адамгъа таукеллик берген, аны акъылын ишлетген зарядка этдиргендиле, башха ишле къурагъандыла.
Гитче Къарачай районда аралыкъда уа аккала бла аммала, цифралы ишлеге къошулуб, белгиленнген курсланы ётюб, компьютерде ишлерча билим алгъандыла. Джылы келген адамла Социал фонд бла кърал болушлукъ табдырыуну электрон сервислеринде сынау ишле бардыргъандыла. Энди ала онлайн халда кърал болушлукъну тынч табаргъа юреннгендиле.
«Сау болсунла бу аралыкъны ачханла, аны тутханла, ишин бардыргъанла, биз бусагъат заманны джангы технологиялары бла таукел, аккылсыз хайырланырча мадарла къурагъанлары ючюн. Мен энди врачха кесим тынч джазылаллыкъма, керекли документлени джарашдырыргъа боллукъма», – дегенди Хабез районну аралыгъыны активисти Хизир Тутов.
Алай бла, Социал фондну Къарачай-Черкесияда бёлюмюню аралыкъларында тамада тёлю заманын зауукълу, хайырлы ашырады. Мындан ары да бизде кёб тюбешиуле, сейир проектле, мадарла къураллыкъдыла.
КъЧР-да быллай аралыкъла къалайлада болгъанларын, аланы ишлери къалай къуралгъанларын СФР-ни бёлюмюню сайтында билирге боллукъду.
Шаганова Анна,
Эресейни Социал фондуну КъЧР-де бёлюмюню СМИ-ле бла ишлеген къауумуну тамадасы.




