Черкесск шахарда джашагъан бир тиширыу, кесин хыйлачылагъа алдата башлаб, артда не эте тургъанын эсгериб, къоранчсыз къалгъанды.

Эресейни МВД-ны Черкесск шахарда бёлюмюне 36 джыл болгъан джергили тиширыу аманлыкъчыладан тарыкъгъанды.
Ол билдиргенден, анга биреулен, телефон бла къонгурау къагъыб, кесин Финанс джумушланы хакъындан организацияны къуллукъчусуча танытханды. Ол адам: «Налог декларациянг таб джазылмагъанды, аны дженгил огъуна тюзетирге керекди», – деб, муну сагъышлы этгенди. Ызы бла да, приёмгъа джазылыр ючюн, декларациянгы номери бла телефонунга келген код керекди деб, аланы айтдыргъанды.
Кодну айтханы бла бу тиширыуну телефонуна Кърал джумушланы порталында энчи кабинетини иши тыйылгъаныны юсюнден билдириу келгенди. Бу сагъайыб, эрлай огъуна ары кириучю паролун тюрлендиргенди. Къайгъылы болгъан тиширыу, анга къонгурау къагъылгъан номер бла ызына сёлешиб, не бола тургъанын билирге излегенди.Андан анга бир тиширыу джууаб бергенди. Ол муну: «Счётунгдан Украинаны аскерине ачха кете турады, аны амалтын джууабха тартылыргъа боллукъса. Ачхангы сакълар ючюн, сени Ара банкны къуллукъчусу бла сёлешдирейим», – деб, башха телефон номер бла байламлы этгенди. Ол телефон номер бла да бир тиширыу: «Ачхангы кесинги счётунгдан бери алыб, башха «къоркъуусуз» счётха салыргъа керексе. Андан башха амал джокъду», – деб алдагъанды.
Хыйлачылагъа ийнаныб, тиширыу банкда сакъланыб тургъан 600 минг сомун бери алгъан-
ды. Ол заманда «Ара банкны къуллукъчусу» бу, NFC-и болгъан джангы смартфон алыб, ачхасын аны бла айтылгъан счётха ашырса излегенди. Ма ол кёзюуде черкесскечи тиширыу, тамам сескекли болуб, полициягъа хапар билдиргенди.
Артда ачыкъланнганнга кёре, Кърал джумушланы порталында черкесскечи тиширыуну аккаунтуна киши да кирелмегенди. Заманында эс джыйгъаныны себебинден, аны ачхасы да кесинде къалгъанды.

КъЧР-ни МВД-ны пресс-къуллугъу.