Къыркъаууз (сентябрь) айны 16-да Къарачай-Черкесияны Башчысы Темрезланы Рашид РФ-ны экономика айыныууну хакъындан министри Максим Решетниковну башчылыгъы бла бардырылгъан кенгешге видеоконференция халда къошулгъанды.

Ол кенгеш Шимал Кавказ федерал округну регионларында табышлылыкъ ишни таб къураугъа аталгъанды. Анга Келир заманда файдалы боллукъ башламчылыкъланы хакъындан агентствону баш директору Светлана Чупшева да къошулгъанды.
Башчы Къарачай-Черкесияда инвесторланы кёллендириуге аталгъан джорукъла къуралгъанларын чертгенди. Ол джорукълагъа кёре, магъаналы инвестицион проектлени толтуруу бла кюрешгенлеге, налог льготала дегенча, тюрлю-тюрлю таблыкъла бардыла.
Аны тышында бизни регионда Инвестицион комитет да ишлейди. Ол инвесторланы джарсыуларына тыйыншлы эс бёледи. Дагъыда, инвесторланы республиканы башчылыгъы бла терк огъуна байламлы болур хыйсаблары барды. Аллай байламлылыкъ джюрютюлгенини себебинден, табышлылыкъ бла кюрешгенлени ишлерине тыйгъыч болгъан кемликле дженгил огъуна тюзетиледиле.
Табышлылыкъ бла кюрешгенле инвестицион проектлени толтуруу бла байламлы бютеу джумушларын бир джерде (принцип одного окна) баджарырча таблыкъла да къуралгъандыла.
Бу джорукъла, таблыкъла заманны излемине кёре игилендирилгенлей турадыла. Алай бла, Къарачай-Черкесия, табышлылыкъ бла кюрешиуню юлгюсюча теджелген миллет моделни кёргюзюмлерине джетер ючюн, баджарыллыкъ ишлени «джол картасын» хазыр этгенди. Анга табышлылыкъ бла кюреширге таб болум къурау бла байламлы ишле, аланы кимле, не заманнга баджарлыкълары толу джазылгъанды.
«Джол картагъа» тюшюрюлген ишлени толтуруучу властны регионал органлары, табигъат байлыкъла бла баджаргъан организацияла, санагъат ведомствола, табышлылыкъ бла кюрешгенле бирге баджарлыкъдыла.
«Джол картада» инженер инфраструктура бла хайырланыб башлар ючюн, этилиучю ишлени дженгил баджарыугъа айырылыб эс бёлюннгенди.
Аны юсюнден Къарачай-Черкесияны Башчысы Темрезланы Рашид МАХ мессенджерде кесини официал каналында: «Президентибиз Владимир Путин 2030-чу джылгъа Эресей табышлыкъ бла кюрешгенлеге таб болум къурауда 20 алчы къралны тизимине кирирге кереклисин къаты айтханды. Миллет Башчыбызны ол излемин толтурур ючюн, энтда кёб иш этилирге керекди. Табышлылыкъ бла кюрешгенле, ток, газ дегенча, ишлерин таб бардырыргъа керекли затла бла дженгил хайырланыб башларча этиуге, аланы къагъыт чотларын дженгил джарашдырыугъа аслам эс бёлюрге тыйыншлыды», – деб джазгъанды.
КъЧР-ни Башчысы республиканы Экономика ёсюмюню министерствосуна, табышлыкъ бла кюрешгенлеге таб болум къурагъан алчы регионланы ашхы сынамларын хайырландыра, «джол картаны» бусагъатдан эсе табыракъ джарашдырыргъа борч салгъанды.

 
{jcomments}