Демография болумну игилендириуню, адам санын кёбейтюуню эмда узакъ ёмюрлю болууну джылында Къарачай-Черкесияда джангы туугъан сабийлеге джараулу затланы биринчи болуб прокат пункту ачылгъанды.
Ол Черкесскеде «Росинка» реабилитацион аралыкъны тамалында ишлеб башлагъанды. Аны юсюнден КъЧР-ни Башчысы Темрезланы Рашид МАХ мессенджерде джазгъанды. Энди анала сабийлерине джыл бла джарым болгъунчу алагъа керекли затланы, ачха да тёлемегенлей, алайдан алыргъа боллукъдула. Ол зат аналагъа уллу болушлукъду.
Бу прокат пункт бла кёб сабийлери болгъан, къарыусуз джашагъан, кемизли сабийлени ёсдюрген юйдегиле хайырланныкъдыла.
– Эресейни Президентини аманаты бла джарашдырылгъан «Юйдеги» миллет проектни джашаугъа сингдириуде бу пункт ашхы атламды. Быллай ишле, аталагъа-аналагъа кёлтюргючлюк этген бла къалмай, бизни республикада сабийлени аслам болурларына себеблик да этерикдиле, юйдегини магъанасын ёсдюрлюкдюле, – деб джазгъанды Темрез улу.
Хапар билирге излеген бу телефон бла сёлеширге боллукъду: 8(8782) 27-20-29. Аралыкъны орналгъан джери: Черкесск шахар, Космонавтланы орамы, 4.




