Къыркъаууз айны ал кюнлерини биринде Къарачай-Черкес Республиканы Башчысы Темрезланы Рашид КъЧР-ни окъуу бла илму министри Инна Кравченко бла тюбешгенди.

Сёз сохталагъа окъуу-билим бериуню асыулу этиуню юсюнден баргъанды. Бусагъатда къралда эл школланы билимли, сынамлы устазла бла баджарыугъа айырылыб эс бёлюнеди, ол зат бла байламлы «Земский учитель» деген федерал программаны джашаугъа сингдириу къалай баргъаныны хакъындан да билирге излегенди регионну Башчысы.
Бу программаны тамалында «земский» атха ие болгъан тогъуз устаз быйыл окъуу джыл эл школлагъа атланнганды.
– Ол устазла аланы алларында тургъан борчну толу сезедиле – эл школлада окъугъан сохталагъа терен билим алдырыр ючюн, ала къолларындан келгенни барын да этериклерине сёз да джокъду. Аланы ичлеринде сегизеулен республикада джашагъан адамладыла, бир устаз бизге Краснодар крайдан келгенди. Ол зат тышында джашагъанла бизни республиканы джаратханларына шагъатлыкъды. Устазланы бири, кеси сабий заманында окъугъан школгъа келиб, ёсюб келген тёлюлеге акъыл-билим бериб тебрегенди, – деб джазгъанды, тюбешиуню эсеблей, МАХ миллет мессенджерде кесини каналында КъЧР-ни Башчысы Темрезланы Рашид.
Программа 2020-чы джыл джюрюш алгъанды. Андан бери «земский» атны джюрютген 61 устазгъа бир ызгъа кърал биришер мелиуан сом бергенди. Мындан ары да терен билимли устазланы эллеге алландырыр иннетде республика кеси да, 2022-чи джылдан башлаб, «земский» устазлагъа бир ызгъа 100 мингишер сом бериб тебрегенди.
Тюбешиуню кёзюуюнде джай каникулланы заманында сабийлени лагерледе солугъанларыны хакъындан да айтылгъанды. Джыл сайын Луганск Халкъ Республиканы Старобельск районундан келген сабийле бизни тау къойнунда орналгъан лагерлерибизде зауукълу солуб кетедиле.
Аны кибик ушакъны кёзюуюнде республиканы сохталары окъуу китабла эмда аш-суу бла къалай баджарылгъанларына да эс бёлюннгенди.
«Бизни алмаларыбыз – бизни сабийлерибизге» деген джергили программаны джашаугъа сингдирирге кереклиси да чертилгенди.