Къыркъаууз (сентябрь) айны 14-де КъЧР-ни Джамагъат палатасында республиканы муниципал къуралышларына депутатла сайлау къалай барлыгъына къарарыкъ аралыкъ (Ситуационный центр) ачылды.

Анга аталгъан джыйылыугъа КъЧР-ни Джамагъат палатасыны келечилери, джамагъат къараучула, республикан газетлени баш редакторлары къошулгъан эдиле.
КъЧР-ни Джамагъат палатасыны председатели Елена Ляшова кесини сёзюнде аралыкъны ишинден хапар айтды.
«Ол аралыкъда джамагъат къараучула сайлаулада джорукъ къалай сакъланнганына къараб турлукъдула. Быйыл сайлаула Джёгетей Аягъы, Гитче Къарачай районлада бардырыллыкъдыла. Алай бла, биз ол районлада сайлаула законну-джорукъну тамалында ётерча этерге керекбиз. Хар кимни да оюму эшитилирча, хар сайлаучуну эркинлиги бузулмазча болум къурау бизни баш борчубузду», – дегенди КъЧР-ни Джамагъат палатасыны председатели Елена Ляшова.
Аралыкъ талай магъаналы джумушну баджарлыкъды. Биринчиси, ол джамагъат къараучуланы бирикдирликди. Ала Джёгетей Аягъы, Гитче Къарачай районлада сайлаула къалай бардырыллыкъларына къарарыкъдыла. Экинчиси, аралыкъда сайлаула бла байламлы информацияны джыйыб тинтерикдиле. Алай бла, джарсыула болсала, алагъа заманында эс бёлюннюкдю.

(БИЗНИ КОРР.).