Дунияда кёб джашагъан адамларыны саны бла Къарачай-Черкесия Эресейни регионларыны арасында алчы орунланы бирин алады. 2025-чи джылны эсеблерине къараб этилгенди бу оюм.

Б.В. Петровский атлы РНЦХ-ны реабилитацион эмда превентив медицина клиникасы бла узакъ ёмюрлюкню институтуну баш врачы Инна Решетова «Газета. Ru» бла ушагъында Эресейни субъектлерини арасында айырыб бешисин айтханды.
Ол чертгеннге кёре, РНЦХ кёб джашагъан адамла бла байламлы тинтиу ишлени бардыргъан, дуниягъа белгили эксперт, профессор Клаудио Франчески бла бирге кёб тюрлю тинтиуле этиб кюрешедиле. Адамны джашаууна регионал факторла къатылгъанлары бла къалгъанларын ачыкълаугъа уллу эс бёледиле.
Ол тинтиулени тамалында Эресейде «узакъ ёмюрлюлени» картасы джарашдырыллыкъды.
Тинтиу ишле алкъын тамамланмагъанлыкъгъа, врач тиширыу айтханнга кёре, Эресейни регионларыны ичлеринде къайсыларында кёб джашагъан адамланы саны аслам болгъаны ачыкъ болгъанды. Аны кибик – къайсы регионлада адамла аз джашагъанлары да.
Алайды да, 2025-чи джылны эсеблерине кёре эм кёб джашагъан адамла Москвада, Ингушетияда, Дагъыстанда, Къабарты-Малкъарда эмда Къарачай-Черкесиядадыла.
Врач билдиргеннге кёре, адамлагъа кёб джашаргъа себеблик этген затла быладыла: иги экология болум, генетика хыйсабы, джашауда кесин къалай джюрютгени.