Республиканы эки уллу байрамыны аллы бла Черкесск шахарны ара майданында школлагъа джангы автобусланы саугъа этдиле.

КъЧР-ни Правительствосуну Председателини орунбасары Евгений Поляков, КъЧР-ни окъуу бла илму министри Инна Кравченко, «Бирикген Эресей» партияны джергили бёлюмюню исполкомуну тамадасы Джаммаланы Руслан 19 автобусну ачхычын окъуу-билим берген организацияланы башчыларына тутдурдула.
«Школ автобус» кърал программаны эмда «Джангы школ» партия проектни джашауда орун лу эте, бардырылгъанды бу ашхы иш.
Алайды да, ГАЗ эмда ПАЗ маркалы джангы автобусла, сабийлени школгъа джюрютюрге деб, респуб ликаны шахарлары бла районларында орналгъан школлагъа джол тутхандыла. Аланы нелери да табды, ала заманны излемине толу джууаб этедиле.
Хар автобус ГЛОНАСС системала, тахографла, къызыу джюрюшюн мардалаучула, къоркъуусузлукъгъа багъышланнган баула, шофёрну чакъырыучу кнопкала бла баджарылгъандыла.
Машинагъа миннген, тюшген заманда ачылгъан атлауучла бла хайырланыргъа мадар боллукъду. Хар сохта олтургъан джеринде къоркъуусузлукъ бау бла кесин бегитирикди, аны кибик портфеллени салыр джер да барды. Автобусла эшиклери ачылыб тургъанлай джюрюяллыкъ тюлдюле, бир сагъатха 60 километрден къызыу барыргъа чырмау болгъан устройствола да бардыла. Аны кибик бу джангы автобуслада сабийлеге къоркъуусуз джюрюрге мадар берген дагъыда кёб тюрлю зат барды.
Республиканы 162 окъуу-билим берген школунда 280 маршрут бла кюн сайын 8 141 сохта джюрюйдю. Шахарлада школгъа баргъан сабийлени 46,8 процентин автобусла бла джюрютедиле.
Элчи сабийлени 96,4 процентин школ автобусла ташыйдыла. Арт беш джылны ичинде республиканы школ автопаркына 235 джангы автобус къошулгъанды. Келир джыл да школлагъа 20 джангы улоу берилликди.

(Бизни корр.).

 
{jcomments}