Къарачай-Черкесияны Башчысы Темрезланы Рашид МАХ мессенджерде кесини каналында официал халда республикада джашагъанланы Черкесскеде бардырыллыкъ эл мюлкню кёрмючюне-джармалыгъына чакъырыб джазгъанды.
Республиканы кюнюне эмда Черкесск шахаргъа 200 джыл толгъан байрамына аталгъаны себебли, регионну Башчысы аны иги джетишимлерини – ашарыкъ продукция чыгъаргъан предприятиелени ишлерини – юслеринден хапар айтханды. Джердешлерибизге, келген къонакълагъа да дамлы, асыулу продукцияланы теджегенди.
«Джангы джыйылгъан тахта, терек кёгетлени, этден, сютден этилген асыулулукълары бла айырылыб танылгъан фермер мюлклени продукцияларыны кёрмючю Къарачай-Черкесияда эл мюлк дженгил ёсюб, тири джюрюш алыб баргъанына энтда бир кере шагъатлыкъ этеди. Бу санагъатда уруннганланы туугъан джерлерине сюймекликлери, кеслерини ишлерине толу берилиб, джууаблы, уста болгъанлары эл мюлкню мийик дараджагъа чыгъарыргъа себеблик этгендиле. Ала кечеде-кюнде салгъан къыйынлары бизни республикада огъай эсенг, саулай Эресейде аш-суу къоркъуусузлукъну баджарадыла. Ол джигер адамланы кючюнден этилген дамлы, асыулу продукцияланы кёрмючюне джердешлерими, къонакъланы да чакъырама. Ала кеслери кёрюб, ашаб кёрселе, къууанныкъларына ишексизме», – деб джазгъанды каналында КъЧР-ни Башчысы Темрез улу.
(БИЗНИ КОРР.).




